Дархан хотод Ардын боловсролын тэргүүний ажилтан, Биеийн тамирын тэргүүний ажилтан, спортын мастер нэрт дасгалжуулагч ЦЭРЭНЖАВЫН ЖИГДЭН агсны нэрэмжит зургаа дахь удаагийн чөлөөт бөхийн өсвөр үеийн олон хотын тэмцээн энэ сарын 6-ны өдөр  нээлтээ хийлээ.

           Ерөнхий ивээн тэтгэгчээр “БАГАНАДАНТ ХХК” ажиллан, Дархан-уул аймгийн ЗДТГ, аймгийн Чөлөөт бөхийн холбоо, Биеийн тамир спортын газар хамтран зохион байгуулж, Монголын Чөлөөт бөхийн холбооноос томилогдсон шүүгчдийн бүрэлдэхүүн Олон улсын дүрмийн дагуу шүүн явуулж байна.

         Тэмцээнд Улаанбаатар хот, “Алдар” спорт хороо, Дархан, Сэлэнгэ, Өмнөговь, Дорноговь, Говь-Алтай, Сүхбаатар зэрэг аймгуудаас гадна Хиагт, Улаан-Үд, Өвөр Монголын Өөртөө засах орны баг тамирчид оролцож буйгаараа онцлог бөгөөд нийт 24 клубийн 370  тамирчин өрсөлдөж байна.

         Тэмцээний нээлтийн үеэр Чөлөөт бөхийн холбооны дээд шагнал "Ялалт" одонгоор ахмад тамирчин, спортын мастер Ч.Биндэрьяа, О.Жаргалцэнгэл нарыг шагнаж урамшуулсан юм. Мөн Аймгийн Засаг дарга бөгөөд Дархан-Уул аймгийн Чөлөөт бөхийн холбооны тэргүүн Б.Азжаргал дасгалжуулагч нарт гарын бэлэг гардуулж амжилт хүслээ.