Азербайжан Улсын нийслэл Баку хотод чөлөөт бөхийн 36 дахь удаагийн цэргийн ДАШТ арваннэгдүгээр сарын 27-оос, арванхоёрдугаар сарын 3-ны өдрүүдэд болсон билээ. Тус ДАШТ-ий эмэгтэйчүүдийн 50 кг-ын жинд Б.Мөнхнар тэргүүлж, дэлхийн аварга болсон юм. Батлан хамгаалах яамны “Алдар” спорт хороо, Зэвсэгт хүчний 311 дүгээр ангийн тамирчин Бямбасүрэнгийн Мөнхнартай ярилцлаа.

-Армийн дэлхийн аварга болсонд баяр хүргэе. Хэдэн барилдаан хийж алтан медаль хүртэж, цэргийн ДАШТ-ий аварга болсон бэ?

             -Баярлалаа. Энэ удаагийн Армийн ДАШТ-д нийт гурван барилдаан хийж, алтан медаль хүртсэн.

-Алтан медалийн төлөөх барилдааныг ямар улсын бөхтэй хийсэн бэ?

               -Манай жингийн бөхчүүд тойргоор хоорондоо барилдаж аваргаа тодруулсан.

-Хамгийн хүнд, ширүүн өрсөлдөгч ямар улсын тамирчин байв?

          -Цэргийн дэлхийн аварга шалгаруулах тэмцээнийг зохион байгуулагч эзэн орон Азербайжан Улсын тамирчин хамгийн хүчтэй, ширүүн өрсөлдөгч байлаа.

-Тив, дэлхийн медальтай шилдэг бөхчүүдтэй барилдав уу?

          -Тив, дэлхий, олимпын медальтай бөхчүүд байсан үгүйг нь сайн мэдээгүй. Гол нь барилдаандаа анхаарлаа хандуулж, дараа, дараагийн өрсөлдөгчөө ялахын төлөө хамаг анхаарлаа төвлөрүүлсэн.

-Өмнө нь цэргийн ДАШТ-д барилдаж байсан уу?

           -Урд, өмнө нь цэргийн ДАШТ- оролцож үзээгүй. Анх удаагаа цэргийн дэлхийн аварга шалгаруулах тэмцээнд барилдаж байна.

-Миний дүү өөрийгөө танилцуулахгүй юу?

         -Намайг Бямбасүрэнгийн Мөнхнар гэдэг. Би 24 настай Айлын бага хүүхэд, дээрээ нэг ахтай. Харин одоо хадам ээж, нөхөр хүүхдийнхээ хамт амьдардаг.

- Аль нутгийн хүүхэд вэ?

             -Би Улаанбаатар хотод төрж, өссөн. Хотын унаган хүүхэд.

-Чөлөөт бөхийн спортоор хичээллээд удаж байгаа юу. Хэдэн настайгаасаа чөлөөт бөхөөр хичээллэв?

         -Чөлөөт бөхийн спортоор 2012 оноос эхлэн хичээллэж байгаа. Батлан хамгаалах яамны, Зэвсэгч хүчний “Алдар” спорт хорооны багш, Монгол Улсын гавьяат дасгалжуулагч Цэрэнбаатарын Хосбаяр, Монгол Улсын гавьяат тамирчин, ДАШТ-ий хүрэл медальт Цэрэнбаатарын Цогтбаяр гэдэг хоёр мундаг багшийн шавь болж бэлтгэл, сургуулилалт хийж эхэлсэн. Одоо МУГТ Бадрахын Одончимэг, МУГТ Ганзоригийн Мандахнаран, МУГД Ц.Хосбаяр багш нарынхаа удирдлага дор бэлтгэлээ хийж байгаа.

-Яагаад чөлөөт бөхийн спортыг сонгож хичээллэх болов?

           -Би бага ангид байхаасаа л сургуулийнхаа бүх л тэмцээн, уралдаанд ордог хөнгөн атлетикаар хичээллэдэг спортлог хүүхэд байсан. Уг нь манай ах барилдах гэж байсан юм. Гэтэл ах өөртөө нэг л итгэлгүй, эргэлзээд байлаа. Тэгээд л би ахынхаа оронд хөнгөн атлетикаа орхиод чөлөөт бөхийг сонгосон.

-Цэргийн ДАШТ-ээс өмнө ямар тэмцээнүүдэд оролцож байв. Өөрийн гаргасан амжилтуудаа сонирхуулахгүй юу?

           -Чөлөөт бөхийн өвсөр үеийн дэлхийн аварга шалгаруулах тэмцээний хүрэл медальтай, Өсвөр үе, залуучууд, насан хүрэгчдийн улсын аварга шалгаруулах тэмцээний хэд, хэдэн медаль бий.

-“Алдар” спорт хороонд хөнгөн жингийн өрсөлдөгч олон бий. Тэдэн дундаас ялгарч, тодорч гарч ирэх амаргүй биз?

          -“Алдар” спорт хороонд хэдэн жилийн өмнө хөнгөн жингийн эгч нар болон үеийн өрсөлдөгч охид олуулаа байсан. Харин одоо зарим нь барилдахаа больсон. Манай жингийн эгч нар жин ахиж, дээшлээд явчихсан. Одоо манай жингийн 2-3 тамирчин л байгаа.

-Бэлтгэлийн хамтрагч найз нь хэн бэ. Хэнтэй гол төлөв хамтарч бэлтгэл хийдэг вэ?

          -Бэлтгэлээ ихэвчлэн өсвөрийн хөнгөн жингийн эрэгтэй дүү нар, Мөнхтүвшин, охидоос Оюундарь, Отгонтуяа болон Болор-Эрдэнэ эгч, Саруул дүү гээд л аль олдсонтойгоо л бэлтгэлээ хийдэг дээ. Манай бэлтгэлийхэн хөнгөн жин ч бай, хүнд жин ч бай хамаагүй, нэг сэтгэл, зорилготойгоор хамтарч, нийлж бэлтгэлээ хийдэг. Тэр нь гоё санагддаг. Бие, биенээ хурцалж, хэн, хэнийхээ барилдааныг сайжруулахын тулд бид нэгдэж, нэг хамт олон болж чаддаг.