Япон Улсын нийслэл Токио хотод жүдо бөхийн 2023 оны сүүлчийн тэмцээн болох “Их дуулга” тэмцээн өнгөрсөн амралтын өдрүүдэд буюу энэ сарын 2-3-ны хооронд явагдаж өнөрлөв. Тус “Бага дэлхийн аварга” хэмээн нэрлэгддэг “Гранд слам” тэмцээнд дэлхийн 84 орны эрэгтэй 298, эмэгтэй 208, нийт 506 тамирчин оролцсон байна. “Токио 2023” гранд сламын эрэгтэйчүүдийн 60 кг-ын жинд 40 тамирчин, 66 кг-д 48 бөх, 73 кг-д 47 бөх, 81 кг-д 46 бөх, 90 кг-д 39 бөх, -100 кг-д 42 бөх, +100 кг-д 36 бөх барилджээ. Харин эмэгтэйчүүдийн 48 кг-ын жинд 26 тамирчин, 52 кг-д 31 бөх, 57 кг-д 31 бөх, 63 кг-д 35 бөх, 70 кг-д 31 бөх, -78 кг-д 28 бөх, +78 кг-д 26 бөх барилдсан байна.

Багийн нэгдсэн дүнгээр Япон Улсын жүдочид долоон алт, таван мөнгө, дөрвөн хүрэл медальтайгаар тасархай амжилт үзүүлэн,  нэгдүгээр байрт шалгарсан юм. Хоёрдугаар байрт Өмнөд Солонгосын баг нэг алт, нэг мөнгө, хоёр хүрэл медальтайгаар оров. Багийн дүнгээр гуравдугаар байрт Бразил Улс нэг алт, нэг мөнгөн медальтайгаар шалгарсан. Түүний араас Нидерланд  нэг алт, хоёр хүрэл, Азербайжан нэг алт, хоёр хүрэл,  Канад нэг алт, нэг мөнгө, Франц хоёр мөнгө, Израиль нэг мөнгө, хоёр хүрэл, Гүрж нэг мөнгө, нэг хүрэл медальтайгаар эхний есөн байрт шалгарсан. Харин  Монгол Улсын баг нэг мөнгө, нэг хүрэл, хоёр тавдугаар байр, хоёр долдугаар байрын амжилтаар, дэлхийн 84 орноос эхний аравдугаар байрт шалгарсан амжилт үзүүллээ.

 Жүдо бөхийн шигшээ багийн дасгалжуулагч Ч.Болдбаатар, М.Бундмаа нарын удирдлага дор 20 тамирчин Токиод зодогложээ. Тэмцээний эмэгтэйчүүдийн 48 кг-ын жинд Б.Баасанхүү, 52 кг-д Л.Сосорбарам, 57 кг-д Л.Энхрийлэн, 63 кг-д Д.Есүй, М.Ичинхорлоо, 70 кг-д Б.Ням-Эрдэнэ, -78 кг-д О.Хүслэн, +78 кг-д А.Адъяасүрэн нар өрсөлдсөн. Харин эрэгтэйчүүдийн 60 кг-д Э.Ариунболд, Б.Цогт-Очир, 66 кг-д Б.Эрхэмбаяр, Ё.Басхүү, 73 кг-д Б.Эрдэнэбаяр, Ц.Цогтбаатар, 81 кг-д Л.Сэргэлэн, 90 кг-д Ц.Дагвадорж, -100 кг-д Б.Гончигсүрэн, Г.Алтанбагана, +100 кг-д О.Цэцэнцэнгэл, Ө.Пэрэнлэйжамц нар барилдав.

Эмэгтэйчүүдийн 48 кг-ын “D” хэсгийн нэгдүгээр тойрогт ОУХМ Б.Баасанхүү гоц мөргөн ялалт авсан. Хоёрдугаар тойрогт Португалийн Raquel Brito-г ялсан.Харин гуравдугаар тойрогт Японы Natsumi Tsunoda аваргад ялагдсан. Дагах тойргийн барилдаанд Тайванийн Lin Chen Hao-д хожигдож шагналт долдугаар байрт орлоо. Тайванийн бөхийг хожих боломж түүнд байсан. Тэр боломжоо гаргаж чадсангүй.

ОУХМ Л.Сосорбарам 52 кг-ын “С”  хэсгийн нэгдүгээр тойрогт Испанийн Estrella Lopez Sheroff-ийг, хоёрдугаар тойрогт Португалийн Diogo Joana-г ялсан. Хэсгийн аваргын төлөөх барилдаанд Израилийн Gefen Primo-д хожигдлоо. Дагах  тойргийн барилдаанд ОУХМ Б.Хорлоодойг ялсан. Улмаар хүрэл медалийн төлөөх барилдаанд Унгарын “Шилдэг бөх” амаргүй өрсөлдөгч Pupp Reka-ялж, “Токио 2023” их дуулгын хүрэл медалийн эзэн боллоо.

Дэлхийн аваргын хошой хүрэл медальт Л.Энхрийлэн 57 кг-ын “А” хэсгийн нэгдүгээр тойрогт Японы  Ayami Takona-д хожигдож тэмцээнээ өндөрлүүлэв. Залуу тамирчин Д.Есүй 63 кг-ын “В” хэсгийн нэгдүгээр тойрогт гоц, мөргөн ялалт авсан. Хоёрдугаар тойргийн барилдаанд Польшийн Angelika Skymanska-д хожигдсон. Түүнд тэмцээний туршлага, барилдааны олон хувилбар дутагдаж байна. Энэ жингийн “D” хэсгийн нэгдүгээр тойргийн барилдаанд ОУХМ М.Ичинхорлоо, Германы Nadja Bazynski-д хожигдов. Тэрбээр 57 кг-аас жин өгсөн барилдаж байгаа билээ. Жиндээ нэг л дасаж өгөхгүй байна. М.Ичинхорлоод 57 кг-ын жин нь илүү таарсан юм шиг санагддаг.

Залуу тамирчин Б.Ням-Эрдэнэ, 70 кг-ын “В” нэгдүгээр тойрогт, ОХУ-ын Daria Khramoikina-д хожигдлоо. -78 кг-ын “В” хэсгийн нэгдүгээр тойрогт залуу тамирчин О.Хүслэн, Өмнөд Солонгосын Yoon Hyun Ji-д ялагдсан. Манай эмэгтэй тамирчид барилдааны арга барилаа өөрчлөхгүй бол амжилт гаргахад үнэхээр хүнд байна. +78 кг-ын “В” хэсгийн нэгдүгээр тойргийн барилдаанд ОУХМ А.Адъяасүрэн гоц мөргөн ялалт авсан. Хоёрдугаар тойрогт тэрбээр ОХУ-ын Elis Startseva-д яландсан. А.Амарсайханы барилдаан нэг л болж  өгөхгүй байна. Тэрбээр сэргэлт авч чадалгүй, эсвэл бэртэл, гэмтэлтэй тэмцээнд орсон байж магадгүй. Түүний  хурдтай, хөдөлгөөнтэй барилдаан нэг л харагдахгүй байлаа.

     Эрэгтэйчүүдийн 60 кг-ын жингийн “В” хэсгийн нэгдүгээр тойрогт Б.Цогт-Очир, Румыны Alexandru Matei-г ялсан. Хоёрдугаар тойрогт Узбекистаны Dishodbek Baratov-ыг ялсан. Гуравдугаар тойрогт Азербайжаны Balabay Aghayev-т хожигдож тэмцээнээ дуусгасан. Б.Цогт-Очир үнэхээр хичээж, сайн барилдлаа. Энэ жингийн “D” хэсгийн нэгдүгээр  тойрогт Э.Ариунболд гоц мөргөн ялалт авсан. Хоёрдугаар тойрогт Азербайжаны Nizami Imranov-т хожигдсон. Манай 60 кг-ын хоёр бөх хоёулаа Азербайжаны бөхчүүдэд ялагдсан гэхээр, энэ жингийн монгол бөхчүүдийн барилдаан нэгэн хэвийн тогтонг байдалд орчихжээ. Мэх техник, барилдааны тактикаа өөрчлөх зайлшгүй шаардлага 60 кг-ын Монголын ижил, тэнцүүхэн барилдаантай бөхчүүдийн өмнө тулгарч буй  тулгамдсан асуудал болжээ.

ОУХМ Б.Эрхэмбаяр 66 кг-ын жингийн нэгдүгээр тойрогт гоц мөргөн ялалт авсан. Улмаар хоёрдугаар тойрогт Узбекистаны Saldor Nurillaev-ыг, гуравдугаар тойрогт Б.Нармандахыг, “В” хэсгийн аваргын төлөөх барилдаанд  Испанийн David Torne Garcia-г ялсан. Дөрөвний нэгийн шигшээ барилдаанд Японы Abe Hifumi аваргатай маш сайн барилдсан хэдий ч вазари үнэлгээгээр  хожигдсон байгаа. Хүрэл медалийн төлөөх барилдаанд Туркменийн Hekin Agamammedov-т хожигдож шагналт тавдугаар байрт шалгарлаа.

Энэ жингийн “С” хэсгийн толгойлсон ОУХМ Ё.Басхүү нэгдүгээр тойрог гоц мөргөн ялалт авсан байгаа. Хоёрдугаар тойрогт Тайванийн Cheng Yen Mingi-г, гуравдугаар тойрогт Израилийн Matan Kokolayev-ыг, хэсгийн аваргын төлөөх барилдаанд Бразилын Willian Lima-г ялсан. Дөрөвний нэгийн шигшээ барилдаанд Францын Dakii Bouba-г буулган авсан. Финалд, алтан медалийн төлөөх барилдаанд Японы Abe Hifumi аваргад ялагдаж мөнгөн медаль хүртлээ.  Энэ жингийн манай хоёр бөх хоёулаа Abe Hifumi аваргын нэг мэхэнд унав. Манай бөхчүүдийн барилдааныг япончууд үнэхээр сайн судалсан байна.  Харин бид тэдний барилдаанд анализ, дүгнэлт хийх, судалгаа дутагдаж байгаа юм шиг санагдлаа.

Дэлхийн аварга Ц.Цогтбаатар 73 кг-д гэмтлийн улмаас барилдаагүй. Энэ жингийн “D” хэсгийн нэгдүгээр тойрогт Б.Эрдэнэбаяр, Румыны Adil Osmanov-т ялагдаж тэмцээнээ өндөрлөсөн. Залуу бөх Л.Сэргэлэн 81 кг-ын “D” хэсгийн нэгдүгээр тойрогт ОХУ-ын Timur  Arbuzov-т ялагдсан.  Залуу тамирчин Ц.Даваадорж 90 кг-ын “В” хэсгийн нэгдүгээр тойрогт Германы  Eduard Trippel-д хожигдлоо. -100 кг-ын “В” хэсгийн нэгдүгээр тойрог ОУХМ Б.Гончигсүрэн гоц мөргөн ялалт авсан. Хоёрдугаар тойрогт Японы Iida Kentaro-г, гуравдугаар тойрогт Өмнөд Солонгосын Won Jong Hoon-ыг ялсан. Хэсгийн аваргын төлөөх барилдаанд Канадын Shady Elnahas-ыг буулган авлаа. Дөрөвний нэгийн шигшээ барилдаанд ОХУ-ын Matvey Kanikouskiy-д хожигдсон. Хүрэл медалийн төлөөх барилдаанд Нидерландын Michael Korreld-д ялагдаж шагналт тавдугаар байрт орсон. Энэ жингийн “D” хэсгийн нэгдүгээр тойрогт ОУХМ Г.Алтанбагана Францын Marc Francois Ngayap-ыг ялсан. Хоёрдугаар тойрогт Өмнөд Солонгосын Kim Seheon-д хожигдсон.

ОУХМ О.Цэцэнцэнгэл +100 –кг-ын “В” хэсгийн нэгдгээр тойрогт гоц мөргөн ялалт авсан. Хоёрдугаар тойрогт Монакогийн Marvin Gaeau-г, гуравдугаар тойрогт Гүржийн Shalva Gureshidze-г тус тус ялсан. Хэсгийн аваргын төлөөх барилдаанд Японы Tatsuro Saito-д хожигдсон. Дагах тойргийн барилдаанд ОХУ-ын  Inal Tasoev-т ялагдаж шагналд долдугаар байрт оров. Залуу тамирчин Ө.Пэрэнлэйжамц энэ жингийн “D” хэсгийн нэгдүгээр тойрогт Японы Fujimoto lo-д хожигдож Токиогийн их дуулгыг өндөрлөв.