Япон Улсад шатны дэлхийн аварга шалгаруулах тэмцээн болсон билээ. Тус ДАШТ-ээс хүрэл медаль хүртсэн хөнгөн атлетикийн тамирчин Б.Номин-Эрдэнэтэй ярилцлаа.

-Япон Улсын Осака хотод зохион байгуулагдсан "WORLD STAIRCLIMBING CHIMPIONSHIPS"-д амжилттай оролцож хүрэл иедаль хүртсэнд баяр хүргэе.

-Баярлалаа

-Миний дүү өөрийгөө танилцуулахгүй юу. Аль нутгийн хүүхэд вэ?

-Намайг Баяртогтохын Номин-эрдэнэ гэдэг. Дархан хот, Дархан-уул аймагт төрсөн.

 -Шатны дэлхийн аварга шалгаруулах тэмцээн гээд байгаа. Тус тэмцээнд ямар зайд гүйгээд хүрэл медаль хүртсэн юм  бэ?

-Тийм ээ, шатны дэлхийн аварга шалгаруулах тэмцээн байгаа юм. Тус ДАШТ-д 59 давхрын 1610 ширхэг шатаар өгсөж гүйж хүрэл медаль хүртсэн.

-ДАШТ-д хэдэн орны хэдэн тамирчин оролцов оо?

- Дэлхийн арав гаруй орны “Элит” ангиллын 45 тамирчид гүйсэн. Мөн Япон Улсын 1000 гаруй тамирчин оролцсон байгаа.

 -Манай улсаас хэдэн тамирчин оролцов. Ямар амжилтууд гаргав?

-Манай Монгол Улсаас гурван тамирчин оролцсон. Хоёр эрэгтэй, нэг эмэгтэй тамирчин. Манай нэг эрэгтэй тамирчин хүрэл медаль хүртэж, нөгөөх нь тавдугаар байрт орсон амжилттай оролцсон.

-Өөрөө хөнгөн атлетикийн марафон гүйлтийн тамирчин уу?

-Тийм ээ, марафон гүйлтийн тамирчин.

-Хэд, хэдэн метрийн зайд гүйдэг вэ. Монгол Улсын дээд амжилтыг хэдэн зай, төрөлд эзэмшдэг вэ?

-Би марафон гүйлтийн 21 км, 42 км, 50 км-ийн зайд гүйдэг. Багахангай дүүрэгт 2023 онд болсон УАШТ-ий 50 км-ийн зайд түрүүлж, улсын хоёр удаагийн аварга болсон.  Мөн 42 км-ийн “Улаанбаатар” олон улсын марафонд гүйж гуравдугаар байр эзэлсэн. Үүнээс гадна “Шри Чин Мой” нэрэмжит УАШТ-ийн зургаан цагийн гүйлтийн тэмцээнд гүйж Монголын рекорд амжилтыг шинэчлэн тогтоож байсан.

–Хэдэн настайгаасаа хөнгөн атлетикаар хичээллэж эхлэв. Аль клуб, нийгэмлэгийн тамирчин бэ. Спортын ямар зэрэг, цолтой тамирчин бэ?

-.2015 онд Дарханд өсвөр үеийн тамирчин байх үедээ Сүхбаатар багшийн удирдлага дор бэлтгэл сургуулилалтаа хийдэг байсан. Харин Улаанбаатар хотод ирж оюутан болоод насанд хүрэгчдийн марафон гүйлтийн тамирчин болж А.Гантулга багш дээр бэлтгэл сургуулилалтаа дагнаж хийж, хичээллэж эхэлсэн.

-Ер нь хөнгөн атлетикийн тамирчдын бэлтгэл, сургуулилалт хийх орчин нөхцөл ямар байдаг вэ?

-Марафон гүйлтийн тамирчид халуун, хүйтэн, цасан шуурга, усан бороотой, салхитай, жавартай, утаа, угаартай ямар ч цаг үед,  янз бүрийн байдалд бэлтгэл, сургуулилалтаа алдахгүйн тулд гадаа бэлтгэл хийж гүйдэг.

-Хөнгөн атлетикаар өөрийн гаргасан амжилтуудыг сонирхуулахгүй юу?

-Япон Улсын Осака хотод зохиосон байгуулагдсан шатны ДАШТ-ий хүрэл медаль. “Xiangyang” марафоны 42 км-т алтан медаль. “Улаанбаатар” олон улсын марафон гүйлтийн 42 км-т гуравдугаар байр. ОХУ-ын “Байгаль нуур” марафоны 42 км-т хоёрдугаар байр. “Khadat trail 50 к”  уулын гүйлтийн тэмцээний 25 км-т тэргүүн байр, алтан медаль. “Алтан-Өлгий” тэмцээний 5.5 км-т нэгдүгээр байрт шалгарсан амжилт үзүүлж байлаа.