Узбекистан Улсын нийслэл Ташкент хотод жүдо бөхийн өсвөр үе, залуучуудын Ази тивийн аварга шалгаруулах тэмцээн энэ сарын 16-19-ний өдрүүдэд болсон билээ. Тус тэмцээнд 15 орны 181 тамирчин хүч үзсэн.  2023 оны залуучуудын Ази тивийн аварга шалгаруулах тэмцээний эрэгтэйчүүдийн 60 кг-ын жинд хүрэл медаль хүртсэн “Мон-Алтиус” БТДС-ийн оюутан Нямсүрэнгийн Мэндсайхантай ярилцлаа.

-Жүдо бөхийн залуучуудын Ази тивийн аварга шалгаруулах тэмцээнээс хүрэл медаль хүртсэнд баяр хүргэе.

- За танд, маш их баярлалаа.

-Миний дүү өөрийгөө танилцуулаач, одоо хэдэн настай вэ. Аль аймгийн уугуул хүүхэд бэ?

-Намайг Нямсүрэнгийн Мэндсайхан гэдэг. Ирэх арванхоёрдугаар сард 20 нас хүрнэ. Би Архангай аймгийн Хайрхан суманд төрж, өссөн.

-Жүдо бөхөөр хичээллээд удаж байгаа юу?

-Жүдо бөхийн спортоор 2017 оноос эхэлж, хичээллэсэн.

-Жүдо бөхийг сонгон хичээллэх болсон түүхээ сонирхуулахгүй юу?

-Би багын их барилдаж, ноцолдох сонирхолтой хүүхэд байлаа. Тэгээд 2017 онд манай суманд Архангай аймгийн аварга шалгаруулах тэмцээн болсон юм. Тэр тэмцээнд орж үзмээр санагдаад барилдах дур сонирхолдоо хөдлөгдөөд бүртгүүлсэн.  Тэгсэн чинь аймгийн аваргад түрүүлээд бүс, улсын аварга шалгаруулах тэмцээнд барилдах эрх хүртсэн. Тэгээд л улсын аварга шалгаруулах тэмцээнд анх удаа оролцож, барилдаад медаль хүртсэн. Тэр медальдаа урамшаад урам, зориг орж, барилдах хүсэл, эрмэлзлэл улам бадарсан. Өвөө маань барилддаг, бөх хүн байсан болохоор намайг дэмжиж,  жүдо бөхөөр хичээллэх гол түлхэц өгсөн юм.

-Өнгөрсөн 2022 оны Азийн аварга шалгаруулах тэмцээнээс мөн хүрэл медаль хүртсэн билүү?

-Тийм ээ, өнгөрсөн 2022 оны залуучуудын Азийн аварга шалгаруулах тэмцээнээс хүрэл медаль авсан.

-Өмнө нь гаргасан амжилтуудаа сонирхуулаач?

-Жүдо бөхийн залуучуудын Азийн аваргын хошой хүрэл медальтай. Азийн цомын аварга шалгаруулах тэмцээнд хоёр удаа түрүүлж, нэг хүрэл медаль хүртэж байсан. Жүдо бөхийн өсвөр үе, залуучуудын УАШТ-ий 6-7 медаль бий.

-Цагаанаа багш тань, чиний барилдаж буй 60 кг-ын жинд  Афины олимпоос 20 настайдаа хүрэл медаль хүртэж байлаа. Багшийнхаа барилдааны арга барилаас хэр суралцаж байна вэ?

-Тэгэлгүй яах вэ. Цагаанаа багшаасаа их зүйл сурч, заалгаж байгаа. Ерөнхий дөө Монгол хүний давуу чанар, лав барилдаан шүү дээ. Багш өөрийн хийдэг мэх, техник, арга барилыг илүү, түлхүү заадаг. Тийм болохоор багшаас чадах чинээгээрэй сурч, мэдэхийг эрмэлздэг.

-Азийн аваргын хүрэл медалийн төлөөх барилдаанд гоёмсог техник харулж цэвэр ялсан. Ер нь босоо барилдаанаас ихэвчлэн ямар мэхүүдийг хийж барилддаг вэ?

-Би босоо барилдаанаас Монгол үндэсний бөхийн шахаж татах, хутгах, тонгорох бусгах мэхийг ихэвчлэн хийдэг.

-Зооны аваргын төлөөх барилдаанд ямар алдаа гаргаад ялагдав аа?

-Зооны аваргын төлөөх барилдаанд хэтэрхий яараад, хайнга барилдчихуудаа гэж бодсон. Тонгорох мэхний барьц байрлал таарах үед урагшаа дарах гэж байтал ганцчихаар нь барьцаа лавшруулаад мэхээ хийх гэтэл удаад алдаа гаргасан.

-Гэхдээ Азийн аваргын хүрэл медаль гэдэг том амжилт шүү. Энэ жилийн залуучуудын ДАШТ-д барилдсан уу?

-Залуучуудын ДАШТ-д барилдсан. Санасан, хүссэн барилдаанаа гаргаж чадаагүй.

-Насанд хүрэгчдийн УАШТ-д барилдаж байв уу?

-Насанд хүрэгчдийн УАШТ-д хоёр удаа барилдаж үзсэн.

-Ирээдүйн хүсэл мөрөөдөл, зорилт, зорилгоо танилцуулахгүй юу?

-Мөрөөдөлд хязгаар үгүй шүү дээ. Миний хувьд Монголынхоо анхны дэлхийн хошой аварга, олимпын хос медальтан болох өөдрөг, дэврүүн хүсэл мөрөөдөл тээж, зорьж байгаа. Өдөр бүр бэлтгэл, сургуулилалтаа чанартай, үр өгөөжтэй хийхийг хичээдэг.