Оросууд, Монгол, Буриадын үндэсний бөх, Дундад Азийн Узбек,  Киргиз, Казах, Туркмен, Татар, Түрэгстаны бүстэй барилдаан, Ойрадын бух ноолдоон,  цаатангуудын хавсага,Тувагийн хүрээ буюу хүрэш барилдааны мэх техникийг суурь болгон, Японы жүдо барилдааны дүрэм, журмаас санаа авч самбо бөхийг гаргаж ирсэн гэдэг.  Тэртээ 85 жилийн өмнөх, 1938 оны арваннэгдүгээр сарын 17-ны  энэ өдөр самбо бөхийн спорт үүсэж хөгжих эхлэлээ тавьжээ. Энэ өдрийг дэлхий даяар “Самбо бөхийн баярын өдөр” болгон тэмдэглэн өнгөрүүлж байна. Тэгвэл 1968 оны хоёрдугаар сарын 9-ний өдөр, тухайн үеийн БНМАУ-ын Сайд нарын зөвлөлийн тогтоолоор Монгол Улсад самбо бөхийн спорт хөгжүүлэх эхлэлийг тавьсан гэдэг.

Монголын самбо бөхийн холбооны анхны ерөнхийлөгчөөр УИХ-ын дарга агсан Лхамсүрэнгийн Энэбиш 1985-2001 оны хооронд ажилласан. Түүний дараа нь УИХ-ын дарга асан Санжбэгзийн Төмөр-Очир 2001-2010 онд, УИХ-ын гишүүн асан Энэбишийн Мөнх-Очир 2010-2013 оны хооронд ажиллаж байв. Харин өдгөө ТЕГ-ын дарга асан Доржпаламын Гэрэл 2013-2023 онуудад ажиллаж байна. Монголын самбо бөхийн тамирчид насанд хүрэгчдийн дэлхийн аварга шалгаруулах тэмцээнээс медальгүй ирсэн түүх ховор.

Иран Улсын Тегран хотод болсон ДАШТ-ээс гавьяат тамирчин Ш.Чанарав анхлан алтан медаль хүртсэн. Энэ медаль нь бөхийн төрлүүдийн дэлхийн аварга шалгаруулах тэмцээний Монголын бөхчүүдийн хүртсэн анхны алтан медаль гэдгээрээ онцлогтой. Түүнээс хойш манай улсаас дэлхийн 42 алтан медальтан төрөн гарсан байна. Монголоос ДАШТ-ий хамгийн олон алтан медалийг гавьяат дасгалжуулагч, гавьяат тамирчин Хишигбатын Эрдэнэт-Од (56 кг) эзэмшдэг бөгөөд тэрбээр дэлхийн дэвжээнд таван удаа түрүүлжээ.

Түүний араас Г.Жамсран (68 кг), Б.Бат-Эрдэнэ (-100, +100 кг), О.Балжинням (90, -100), Д.Сумъяа (56 кг) нар ДАШТ-ээс гурван алтан медаль хүртсэн юм. Нэмж мэдээллэхэд, манай улсад 1974 онд самбо бөхийн ДАШТ зохион байгуулагдаж байсан бол 1989 онд дэлхийн цом, 1997, 2018 онд Ази тивийн аварга шалгаруулах тэмцээн болж байлaa.