Хятадын Жинжиань хотноо 2023 оны аравдугаар сарын 21-31-ний өдрүүдэд оюутны хөл бөмбөгийн ДАШТ хоёр дахь удаагаа явагдаж байна. Нээлтийн ажиллагаа Жинжиань хотын хөл бөмбөгийн спортын төвийн цэнгэлдэх хүрээлэнд явагдаж, урлаг спортын тоглолт боллоо.

         Тэмцээнд дэлхийн таван тивийн 16 орны  их, дээд сургуулийн эрэгтэй 12, эмэгтэй найман баг нийт 20 багийн 500 орчим төлөөлөгчид оролцож байна. Энэхүү тэмцээн 2019 онд Жинжиан хотноо анх удаагаа зохиогдож байсан юм. Хоёр жилд нэг удаа болохоор төлөвлөгдөж байсан  ч 2021 оны тэмцээн ковидын цар тахлын улмаас хойшлогдон ийнхүү зохиогдлоо.

          Монголын эмэгтэй, эрэгтэй багууд 2018 онд Жинжиань хотноо болсон Азийн аварга шалгаруулах тэмцээнд оролцож байсан юм. Тухайн тэмцээнд оролцсон 16 багаас Монголын оюутны эрэгтэй баг гурван хожил авч арваннэгдүгээр байрт шалгарч байв. Харин Монголын эмэгтэй баг анх удаагаа оролцсон билээ. Ирэх онд ахин Азийн сонгон шалгаруулах тэмцээн энэхүү хотод явагдана.