Монгол Улсын гавьяат тамирчин Бат-Очирын Сэр-Од “Ханжоу 2022”  Азийн наадмын 10.000 м-ийн гүйлтийн зайд хурд сорилоо. Манай тамирчны хувьд сүүлийн хоёр Азийн наадам дараалан марафон гүйлтийн төрөлд “Шилдэг 5”-д хурдалсан ба Инчёнийн наадамд  IV, Жакартад V байр тус тус эзэлж байсан билээ.

           Харин энэ удаагийн Азийн наадамд 5000 м болон 10.000 м-ийн зайд өрсөлдөхөөр мэдүүлэгт багтсан. Энэ удаад 10.000 м-ийн зайг 30 минут 57.71 секундэд туулснаар X байр эзэллээ. 10.000 м-ийн гүйлтэд Бахрейны тамирчин Эфиоп гаралтай Бирхану Балью түрүүллээ. Тэрбээр таван жилийн өмнө Жакартад 5000 м-ийн зайд Азийн наадмын аварга болж байжээ.

         2023 оны хувьд Б.Сэр-Од гавьяатын хувьд бас нэгэн онцгой жил болон үргэлжилж байгаа. Унгар Улсын нийслэл Будапешт хотноо явагдсан хөнгөн атлетикийн ДАШТ-д оролцсоноор тэсвэр тэвчээр шавхсан 42 км 195 м зайн марафон уралдаанд 11 удаа дараалан дэлхийн дэвжээнээ өрсөлдсөн түүхэн амжилтаа ахиулсан.

         Өмнө нь 10 удаа ДАШТ-д марафон гүйлтээр оролцсон түүний амжилт гиннесийн номд тэмдэглэгдээд байсан юм. Тэгвэл “Ханжоу-2022” Азийн наадмын албан ёсны цахим хуудас Б.Сэр-Одын намтараас 2024 оны Парисын Олимпод “зодоглоод” их спортоо орхиж дасгалжуулагчийн албанд шилжих зорилготой байгаа гэсэн ярилцлагыг онцолсон юм. Ирэх жилийн наадам манай гавьяат тамирчны хувьд 6 дахь Олимпын наадам нь болох ба ингэснээр дэлхийн спортын түүхэнд марафон гүйлтээр хамгийн олон удаа олимпод оролцсон гүйгч болж бас нэгэн шинэ түүх бүтээх билээ.

         Б.Сэр-Одын хурд сорих хоёр дахь зай, 5000 м-ийн уралдаан аравдугаар сарын 4-ний өдөр явагдах хуваарьтай байна. Эрэгтэйчүүдийн 1500 метрийн уралдаанд О.Болдоо, Н.Мөнхбаяр нар хурд сорьсон. О.Болдоо нэгдүгээр хэсэгт 3:55.38 минутад замаа дуусгаснаар хувийн дээд амжилтаа шинэчилсэн ч финалд шалгарахад ойрхон байлаа. Тэрбээр хэсэгтээ 11 тамирчнаас 7-д бичигдсэн юм. Харин Н.Мөнхбаяр 3:58.85 амжилтаар барианд орж, хэсэгтээ мөн л долоод жагслаа. Энэ зайд нийт 21 тамирчин хурд сориход О.Болдоо нийлбэр үзүүлэлтээр долоод, Н.Мөнхбаяр 16-д бичигдлээ.