ОХУ-ын Екатеринбург хотноо олон улсын оюутны спортын фестиваль их наадам болсон билээ. Тус их наадмын самбо бөхийн эмэгтэйчүүдийн +80 кг-ын жинд барилдаж хүрэл медаль хүртсэн “Женко” клубийн тамирчин Цэрэндолгорын Санжидмаатай ярилцлаа.

 –ОХУ-д болсон олон улсын оюутны спортын фестиваль их наадмаас медаль хүртсэнд баяр хүргэе. Фестивалийн самбо бөхийн +80 кг-ын жинд хэдэн барилдаан хийж хүрэл медаль хүртсэн бэ?

-Баярлалаа. Олон улсын оюутны спортын фестиваль их наадамд гурван барилдаан хийсэн.

 –Самбо бөх өндөр хөгжсөн Оросын бөхийг хожино гэдэг амаргүй. ОХУ-ын бөх И. Киселеваг 5:0 оноогоор хожсон байна. Түүнтэй ямар тактикаар барилдаж оноогоор илүүрхэн ялав?

-Фестивалийн хүрэл медалийн төлөө ОХУ-ын бөх Киселеватай барилдсан. Тэр их сайн бөх байсан. Би түүнийг түлхүүр эргүүлж 20 секунд дараад үүрэх үед нь арагш нь дараад нэг оноо нэмж аваад 5:0-ээр хожсон.

 –Зооны аваргын төлөөх барилдаанд ямар улсын бөхөд хожигдов?

-Би +80 кг-ын жинд барилдсан бөхчүүдээс насаар хамгийн бага нь байсан. Манай жингийн бөхчүүд надаас насаар эгч, туршлагатай, өндөр том биетэй, хүч, бяртай тамирчид байлаа. Зооны аваргын төлөө ОХУ-ын өөр нэг бөхөд торгуулиар хожигдсон. Тэгээд хүрэл медалийн төлөө барилдсан байгаа.

 –Фестивалийн зохион байгуулалт, тэмцээний шүүлт хэр байв?

-Оюутны их наадмын зохион байгуулалт сайн байсан. Тэмцээний шүүлт дажгүй.

-Чиний барилдааны онцлог гэвэл. Босоо болон хэвтээ барилдаанд ямар мэхийг голчлон хийдэг вэ?

-Би босоо барилдаанаас давхар ачаа, тонгороо, хутгах мэхийг гол төлөв  хийж барилддаг. Миний барилдааны онцлог гэвэл өрсөлдөгчийн барилдааныг харж, хоёр номероор ажиллахыг хичээдэг. Өрсөлдөгчийн хийсэн мэхийг нь дагуулж хариу мэх хийж барилдаж сурахыг хичээж байгаа.

  –Фестивалиас өмнө өсвөр үе, залуучуудын олон улсын тэмцээн, Ази тивийн аварга, ДАШТ-д барилдаж байсан уу?

-Тийм ээ. Өсвөр үе, залуучуудын олон улсын тэмцээнд барилдаж байсан.

-Жүдо бөхөөр барилддаг биз дээ. Самбо, жүдо бөхөөр  гаргасан томоохон амжилтуудыг сонирхуулахгүй юу?

-Жудо бөхөөр 2018 оноос хойш хичээллэсэн. Жүдо бөхийн өсвөр үеийн улсын аваргаас дөрвөн хүрэл, залуучуудын улсын аваргаас хоёр хүрэл медаль авч байсан. Мөн 2022 онд самбо бөхийн дэлхийн аваргаас мөнгөн медаль, 2023 онд өсвөр үе залуучуудын Азийн аваргаас хос мөнгөн медаль, өвсөр үеийн улсын аваргаас хоёр алт, нэг хүрэл, залуучуудаас улсын аваргаас хоёр мөнгөн медаль хүртэж байсан.

-Миний дүү өөрийгөө танилцуулахгүй юу. Аль нутгийн хүүхэд вэ.  Одоо хэдэн настай вэ?

-Би Завхан аймгийн Баянтэс сумын хүүхэд. Одоо би 18 настай.

–Самбо бөхөөр хичээллээд удаж байгаа юу.  “Женко” клубт хэд дэх жилдээ, хэн багшийн удирдлага дор хичээллэж байгаа вэ?

-Би самбо, жүдо бөхөөр хичээллээд гурван жил болж байна.  “Женко” клубт ороод зургаа дахь жилдээ хичээллэж байгаа. Монголын Улсын гавьяат дасгалжуулагч Ш.Цэвэлмаа, ОУХМ Г.Саранзаяа багш нарын удирдлага дор бэлтгэл сургуулилалтаа хийж яваа.

-Бөхийн спортыг сонгон хичээллэх болсон шалтгаан гэвэл?

-Манай гэр бүлийнхэн намайг бөх болгох, барилдуулах сонирхолтой байсан. Аав, ээж хоёр намайг Спортын төв ордон руу дагуулж очиж секцэнд бүртгүүлсэн. Тэд “За ингээд миний охин жүдо гэдэг спортоор хичээллээд үз” гэж билээ.

-Одоо дараагийн оролцох ямар тэмцээн хүлээж байна вэ?

-Одоо 2023 оны аравдугаар сарын 6-8-ны хооронд өвсөр үе, залуучуудын дэлхийн аваргад явах гэж байгаа. Бэтгэл сургуулилалтаа хийгээд  явж байна.