Дэлхийн оюутны универсиад XXXI их наадам Хятад Улсын Чэндү хотод болсон. Тус оюутны универсиад их наадмын жүдо бөхийн 73 кг-ын жинд хүрэл медаль хүртсэн "Мон Алтиус" Биеийн тамирын дээд сургуулийн оюутан, жүдо бөхийн ОУХМ Одгэрэлийн Уранбаяртай ярилцлаа.

-Хятадын Чендү хотод болсон дэлхийн оюутны спортын 31 дэх удаагийн "Универсиад" наадмаас хүрэл медаль хүртсэнд баяр хүргэе. Монголынхоо багийн медалийн салхийг хагалсандаа хэр баяртай байсан бэ?

 -Сайн байна уу. Танай сайтын уншигчдад энэ өдрийн мэндийг хүргэе. Баярлалаа Чэндү оюутны универсиад наадмаас монголын багийн анхны медалийг хүртэж, хүрэл медаль авсандаа маш их баяртай байгаа.

-"Универсиад" наадамд хэдэн барилдаан хийв.  Дөрөвний нэг шигшээ барилдаанд Азербайжаны Rashid Mammadaliyev-т ямар үнэлгээгээр ялагдчих юм. Түүнийг аргалах боломж гарсангүй юу?

-Эхний тойрогт гоц мөргөсөн, тэгээд Энэтхэг, Казахстан, Азербайжан, Франц Улсын бөхчүүдтэй барилдсан. Азербайжаны бөхтэй зооны аварга дээр таарч барилдсан. Уг нь түүнийг бүрэн хожих боломжтой байсан л даа.

-"Универсиад" наадмын хүрэл медалийн төлөө Францын тамирчин Hans Jorris Ahibo-г ямар мэхээр цэвэр ялав?

-Францын бөхийн хоёр ханцуйны барьцан дээрээс суганд шижэх мэхээр вазари үнэлгээ аваад, цагийн төгсгөлд даралтаар цэвэр хожсон.

-Өнгөрсөн хоёрдугаар сард  бага дэлхийн аварга хэмээн нэрлэгддэг Парисын их дуулгаас хүрэл медаль хүртсэн. Олон улсын чанартай тэмцээнээс хүртсэн анхны чинь медаль байв уу?

-Тийм ээ. Миний анхны олон улсын тэмцээн, гранд слам ангиллын анхны медаль маань байсан.

 -Парисын их дуулгын “С” хэсгийн аваргын төлөө Бразилийн шилдэг бөх Daniel Cargnin-д ялагджээ. Түүнтэй хэр ойролцоо барилдсан бэ?

- Бразилын бөх Daniel Gargnin өмнөх олимпын цийкэлд 66 кг-ын жинд барилддаг байсан л даа. Тэгээд Токиогийн олимпын дараагаас 73 кг руу өгсөж орж ирсэн. Манай доод жин байсан учраас ерөнхийдөө би хожно гэсэн бодолтой гарсан.

-Парис 2023 их дуулгын дагах тойргийн барилдаанд Молдавын Petru Pelivan, Өмнөд Солонгосын Heoncheol Kang нарын шилдгүүдийг ялж хүрэл медаль хүртжээ. Парис, Токиогийн их дуулгаас медаль хүртсэн бөхчүүд ДАШТ-ээс медаль хүртдэг уламжлалтай. Дэлхийн аваргад барилдсан уу?

-Дэлхийн аварга шалгаруулах тэмцээнд хараахан орж чадаагүй байгаа. Гэхдээ оролцох эрхээ автлаа бэлтгэлээ маш сайн хичээнгүйлэн хийж, дэлхийн медальтан болно гэсэн зорилгодоо заавал хүрнэ ээ.

-Монгол Улсынхаа насанд хүрэгчдийн улсын аварга шалгаруулах тэмцээнд хэдэн удаа оролцож байв. Ямар амжилтуудыг үзүүлж байв аа?

-Монгол Улсын аварга шалгаруулах тэмцээндээ таван удаа оролцсон. Нэг мөнгө, хоёр хүрэл медальтай.

-Танай жинд олимпын хүрэл медальт, дэлхийн аварга Ц.Цогтбаатар байгаа. Цогоотой хэдэн удаа таарч барилдав. Та хоёрын ялалт, ялагдлын харьцаа хэд байгаа вэ?

-Тийм ээ. Цогоотой хоёр удаа таарч, хоёр хожигдсон байгаа. Гэхдээ манай жинд дэлхийн аварга, олимпын медальтан тамирчин байна. Тийм болохоор бид нарын бэлтгэл сургуулилалт сайжирч байгаа. Үүнийг нь дагаад олон улсын тэмцээнд барилдахад сэтгэл зүйд  хүртэл сайнаар нөлөөлдөг.

-Жүдо бөхөөр хичээллээд хэдэн жил болж байгаа вэ. Хэн багшийн шавь бэ?

-Жүдо бөхөөр 2013 оноос хойш хичээллэж байна. Анх Хэнтий аймгийн Бор-Өндөр сумын “Боржигон” дэвжээнд Ц. Ганхүү Д. Амгаланбаатар гэх хоёр багш дээрээ бэлтгэл сургуулилалт хийж эхэлсэн.

-Босоо болон хэвтээ барилдаанд гол төлөв ямар мэхийг хийж барилддаг вэ?

-Босоо барилдаанд ихэвчлэн хөл тавих, үүрэх, өмсөх, шижэж эргэх зэрэг мэхүүдийг хийж барилддаг. Харин хэвтээ барилдаанд өчих, боох, даралт авах мэхүүдийг хийдэг.

 -Жүдо бөхийг сонгож хичээллэх болсон шалтгаан юу байв?

-Өөрийн сонирхолдоо хөтлөгдөөд л жүдо бөхөөр хичээллэж эхэлсэн. Спорт бол ер нь хүнийг зөв хүмүүжилтэй, тэсвэр тэвчээртэй, бусдыг хүндлэх зэрэг эерэг зүйлийг зааж сургадаг гэж боддог.

 -Танайх бөхийн удамтай юу?

-Манай гэр бүлд бөхийн удам байхгүй ээ. Би өөрийн  хүсэл сонирхлоо  дагаад жүдо хичээллэж, амьдралаа болгоод л явж байна даа.