Зүүн Азийн залуучуудын спортын их наадмын сагсан бөмбөгийн 3x3-ын эрэгтэйчүүдийн ангилалд алтан медаль хүртсэн Монгол Улсын шигшээ багийн тамирчин Хүрэлбаатарын Оргилтой ярилцлаа.

-Зүүн Азийн залуучуудын аварга шалгаруулах тэмцээнд түрүүлж, алтан медаль хүртсэнд баяр хүргэе. Хэдэн тоглолт хийж аварга болов?

 -Баярлалаа. Энэ удаагийн Зүүн Азийн залуучуудын наадамд манай баг гурван хүнд, ширүүн тоглолт хийж алтан медальт хүртлээ.

-Алтан медалийн төлөөх тоглолт нэлээн ширүүн өрсөлдөөнтэй боллоо. Ямар тактик, хувилбараар тоглов оо. Алтан медаль хүртэнэ гэсэн итгэлтэй байсан уу?

  -Тийм ээ, манай багийнхан хамгаалалт дээрээ илүү анхаарч, хүчтэй тоглолт хийнэ гэж тоглолтын өмнө ярилцсан юм. Өмнөх тоглолт дээр хоёр оноо авахыг илүүд үзэж тоглосон. Тэгэхээр сүүлийн хариуцлагатай тоглолт дээр шидэлт сайн орохгүй байх юм бол дараагийн тоглолт хүндэрнэ. Тийм болохоор найдвартай нэг оноогоо аваад явах нь дээр гэж ярилцаад гарсан.

 –Хятадын баг тоглолтын эхний хэсгийг 6:0-ээр тэргүүлээд эхлэхэд сандарсан уу?

         -Нэг их сандраагүй ээ. Зүгээр тайван байсан. Ямар хувилбар сонгож, яаж тогловол тоглолтыг өөрсдийн тал руу буцаагаад эргүүлж болох вэ гэдэг дээр анхаарсан. Тэгээд тоглолтын өмнө ярилцсан хувилбар арга барилаараа хожино гэсэн итгэлтэй байсан даа.

 –Зүүн Азийн залуучуудын наадмын аварга болох, алтан медаль хүртэх мэдрэмж ямар байв?

-Маш гоё байсан. Хүмүүс баяр хүргэж, хамт зураг даруулаад, танихгүй хүмүүс хүртэл “Сайн тоглосон, сайн байсан шүү та нар” гээд урамын үг хэлж байлаа. Тэр бүхэн үнэхээр маш гоё халуун дотно мэдрэмж төрүүлдэг юм билээ.

 -Хятадын багийг хэсгийн тоглолтод өмнө нь хожсон бил үү?

-Тийм ээ, бид Хятадын багтай өмнө нь таарч тоглохдоо 21:17-оор хожиж байсан. Тийм болохоор тэднийг дахин хожиж чадна гэдэгтээ итгэлтэй байсан.

–Зүүн Азийн залуучуудын наадмаас өмнө танай баг Ази тивийн аваргаас хүрэл медаль хүртсэн гэсэн. Тэр өсвөр үеийн тэмцээн байсан уу, Залуучуудын Азийн аваргын тэмцээн юм уу?

-Тэр тэмцээн “U17” насны Ази тивийн аварга шалгаруулах тэмцээн байсан. Бид тэр тэмцээний шагналт байранд шалгарах юм бол дэлхийн аварга шалгаруулах тэмцээнд оролцох эрхээ авах ёстой байлаа. Тийм болохоор хичээж тоглож хүрэл медаль хүртсэн.

-Өөрийнхөө сагсан бөмбөгийн спортоор гаргасан томоохон амжилтуудыг сонирхуулахгүй юу?

     -Би “U17” насны улсын аварга шалгаруулах тэмцээнээс мөнгөн медаль хүртэж, “Шилдэг довтлогч”-ийн шагнал хүртсэн. Мөн “U16” насны “Modun cup” тэмцээнээс мөнгөн медаль “Шилдэг хамгаалан тоглогч” шагналыг хүртэж байсан. Үүнээс гадна “U17” насны  “Asia cup 2022” тэмцээний хүрэл медалийг хүртсэн. “U17” насны Өмнөговь аймагт зохион байгуулагдсан улсын аварга шалгаруулах тэмцээнээс мөнгөн медаль хүртэж байлаа.

-Өөрийгөө дэлгэрэнгүй танилцуулахгүй юу. Хэдэн настай, аль сургуулийн сурагч вэ?

-Би одоо 18 настай. Өнгөрсөн хавар ерөнхий боловсролын 133 дугаар дунд сургуулийг төгссөн.

 –Сагсан бөмбөгийн спортоор хичээллээд удаж байгаа юу.  Хэд дэх жилдээ хичээллэж байгаа вэ?

-Би зургадугаар ангид байх үеэсээ Налайхын Оргил багшийн дугуйланд явж эхэлсэн. Одоо сагсан бөмбөгийн спортоор долоо дахь жилдээ хичээллэж яваа.

–Сагсан бөмбөгөөс өмнө өөр спортын төрлөөр хичээллэж байсан уу?

-Өөр спортоор хичээллэж үзээгүй.

–Өөрийн чинь биеийн өндөр, жин хэд вэ?

-Миний биеийн өндөр 188 cm байгаа. Биеийн жин 73 kg.

 –Танай багийнхан ер нь бүгд их тэгш тоглолттой юм шиг харагдсан. Хамгаалалт, довтолгоо, самбар дор, холын зайны шидэлт гээд гайхалтай байлаа. Энэ бүрэлдэхүүнээрээ цаашдаа хэр удаан тоглох вэ?

       -Манай багийн хүүхдүүд үнэхээр сайн байлаа. Багийнхантайгаа цуг тоглоход үнэхээр түшигтэй. Нэгнийхээ гаргасан алдаа, сул талыг нөгөө нь нөхөж чаддаг. Тийм болохоор бид нэг нэгдмэл баг болон тоглож Зүүн Азийн наадамд амжилттай оролцсон байх. Цаашдаа хэр удаан хамт тоглох вэ гэхээр хэлж мэдэхгүй байна. Энэ наймдугаар сарын сүүлээр дэлхийн аварга шалгаруулах тэмцээн болно. “U18” насны тэр тэмцээнд энэ баг бүрэлдэхүүнээрээ явна. Тийм болохоор цуг бэлтгэл, сургуулилалтаа хийнэ.  Дэлхийд аваргад амжилттай оролцохыг хичээнэ дээ. Тэрнээс цааш яах вэ гэдгийг яг одоогоор хэл мэдэхгүй байна. Ямар ч байсан бүгд их дээд сургууль гээд өөр, өөрийн сонгосон сургуульд орох байх. Гэхдээ бид салсан ч үргэлж нийлж цуг тоглож, хөгжилдөж, нэг нэгдмэл хэвээрээ л найзууд байна даа.