“Улаанбаатар 2023” Зүүн Азийн Залуучуудын наадмын 3x3 сагсан бөмбөгийн тэмцээн Үндэсний Соёл амралтын хүрээлэнд байрлах 3x3 “Park Garden”-д болж байна. Тэмцээнд эмэгтэй дөрвөн улсын баг өрсөлдөх байгаа.  Монгол, БНХАУ, Хонконг, Тайвань зэрэг улсууд оролцож байгаа юм.

        Зүүн Азийн залуучуудын наадмын 3Х3 сагсан бөмбөгийн тэмцээний онцлох эмэгтэй тамирчнаар FIBA 3X3 “ U18” насны дэлхийн чансааны 23 дугаар байрт эрэмбэтэй Б.Номиныг нэрлэж байна. Монгол Улсын “U18” насны шигшээ багийн болон МСБХ-ны Үндэсний дээд лигийн “Улаанбаатар Амазонс” багийн тоглогч.

       Тэрбээр 2022 оны FIBA 3X3 17-оос доош насны Азийн аварга шалгаруулах тэмцээнд Монгол Улсын эмэгтэй шигшээ багаа төлөөлөн оролцож, дөрөвдүгээр байрт орсон байна. Тэрбээр мөн “Улаанбаатар Амазонс” багийнхаа хамтаар МСБХ-ны Үндэсний дээд лигийн 2022-2023 оны улирлын аварга болжээ. Б.Номингийн хувьд наймдугаар сарын 30-нд Унгар Улсад зохион байгуулагдах "FIBA 3x3 “U18” World Cup 2023" тэмцээнд Монгол Улсын шигшээ багийнхаа хамтаар оролцох аж.