Унгар Улсын Будапешт хотноо болж буй чөлөөт бөхийн дэлхийн чансааны оноо олгох  энэ жилийн сүүлийн тэмцээн болж байна. Тус тэмцээнээс монголын баг, тамирчид хоёр дахь алтан медалиа хүртлээ. Олимп, дэлхийн хүрэл медальт, Монгол Улсын гавьяат тамирчин Бат-Очирын Болортуяатай эмэгтэйчүүдийн 53 кг-ын жингийн финалд энэ жингийн дэлхийн чансааг тэргүүлэгч, 2023 оны Пан-Америкийн аварга, 2021 оны “U23” насны дэлхийн аварга Эквадорын Л.Иепес Гузман барилдах байсан ч дэвжээнд гарч ирээгүй юм.

         Б.Болортуяа эхний тойрогт хийлж, улмаар Европийн хошой аварга Шведийн Э.Малмгренийг дөрвөн минут 15 секундэд 10:0-ээр оноогоор цэвэр, 2018 оны ДАШТ-ий хүрэл медальт Канадын Д.Вейкерийг 48 секундэд 10:0-ээр оноогоор цэвэр, 2022 оны дэлхийн аварга АНУ-ын Д.Парришийг хоёр минут 42 секундэд 13:2-оор оноогоор цэвэр ялсан.