Тайланд Улсын Бангкок хотод энэ сарын 12-16-ны өдрүүдэд хөнгөн атлетикийн Ази тивийн аварга шалгаруулах 25 дахь удаагийн тэмцээн эхлэн явагдаж байна.  Азийн аваргын хоёр дахь өдрийн тэмцээнд Монгол Улсын үндэсний шигшээ баг, Зэвсэгт хүчний 327-р анги,  “Алдар” спорт хорооны тамирчин ОУХМ Б. Мөнхзаяа Ази тивийн аварга шалгаруулах хөнгөн атлетикийн тэмцээний 10.000 м-ийн зайн гүйлтэд 33 минут, 24 секунд, 79-н доль цагийн амжилтаар  Монгол Улсын рекорд амжилтыг шинэчлэн тогтоож, хүрэл медаль хүртлээ. Тус зайн алтан медалийг Япон Улсын тамирчин Харүко Кокай 32.59.36 цагийн амжилтаар хүртжээ. Харин мөнгөн медалийг мөн Япон Улсын тамирчин  Момока Кавагүчи 33.24.72 цагийн амжилтаар авсан байна. Б.Мөнхзаяа японы хоёр тамирчнаас ердөө зургаан секундын зайтай барианд орж хүрэл медаль авсан. Тэрбээр 2014 онд Азийн наадмаар 33.31.11-н цагийн амжилтаар  өөрийн тогтоосон Монгол Улсын дээд амжилтыг ийнхүү есөн жилийн дараа 33.24.79-н цагийн амжилт болгон шинэчлэн тогтоогоод байна.