Монгол Улсын Ерөнхийлөгч У.Хүрэлсүхийн ивээл дор зохион байгуулж буй жүдо бөхийн IJF-ийн гранд слам тэмцээн үргэлжилж байна. “Парис 2024” олимпын наадмын оноо олгох дэлхийн өндөр зэрэглэлийн “Улаанбаатар их дуулга-2023” цуврал тэмцээний хоёр дахь өдрийн барилдаан өнөөдөр болно. Тус тэмцээн нь “Steppe Arena”-д энэ сарын 23-25-ны өдрүүдэд явагдаж өндөрлөнө. Өнөөдөр барилдах манай улсын бөхчүүдийн оноолтыг хүргэж байна.

Эмэгтэйчүүдийн 63 кг-ын жингийн “А” хэсгийн нэгдүгээр тойрогт 57 кг-аас жин өгсөн барилдаж байгаа ОУХМ М.Ичинхорлоо, Өмнөд Солонгосын Shin Chaewon-той барилдана. Түүнийг буулган авч чадвал хоёрдугаар тойрогт Канад бөх ДАШТ-ий хүрэл медальт  Beauchemin Pinard-тай хүч сорихоор байна. “В” хэсгийн нэгдүгээр тойрогт Ази тивийн аварга Б.Ганхайч, Австрийн Magdalema Krssakova-тай таарсан байгаа. Түүнийг ялах юм бол хоёрдугаар тойргийн барилдаанд Словений Andreja Leski-тэй хүч үзнэ.

Энэ жингийн “С” хэсгийн нэгдүгээр тойрогт Ц.Сүнжидмаа, Австрийн бөх Lubjana Piovesana-тай барилдана. Түүнийг хожих юм бол хоёрдугаар тойргийн барилдаанд Чехийн Renata Zachova-тай барилдах юм. “D” хэсгийн нэгдүгээр тойрогт өсвөрийн тамирчин Д.Есүй, Оросын Kamila Badurova-той барилдана. Хэрэв түүнийг буулган авч чадвал хоёрдугаар тойрогт Унгарын Szofi Ozbas-тай хүч сорино.

Эмэгтэйчүүдийн 70 кг-ын жингийн “А” хэсгийн нэгдүгээр тойргийн барилдаанд Б.Ням-Эрдэнэ, ОХУ-ын Daria Khramoikina-тай барилдана. Түүнийг ялах юм бол хоёрдугаар тойргийн барилдаанд Узбекистаны Shokhista Nazarova-тай таарна. Энэ жингийн “В” хэсгийн нэгдүгээр тойрогт Б.Ганзаяа, Данийн Laerle Olsen-той барилдах юм. Түүнийг ялж чадвал хоёрдугаар тойргийн барилдаанд Израилийн Maya Goshen-тай таарна.

“С” хэсгийн нэгдүгээр тойрогт Б.Баасанжаргал, Тайванийн Yu-Jing Liao-тай барилдах юм. Түүнийг хожвол хоёрдугаар тойрогт Японы Shiho Tanaka-тай таархаар байна. “D” хэсгийн нэгдүгээр тойргийн барилдаанд С.Лхагвадулам, Португалийн Joana Crisostomo-той барилдана. Түүнийг буулган авч чадвал хоёрдугаар тойрогт Германы Miriam Butkereit-тэй таарах магадлал өндөр байна.

73 кг-ын жингийн “А” хэсгийн нэгдүгээр тойрогт О.Уранбаяр, Азербайжаны Ibrahim Aliyev-тай барилдана. Түүнийг буулган авч чадвал хоёрдугаар тойрогт Казахстаны Daniyar Shamshayev-тай хүч сорино. Энэ жингийн “В” хэсгийн нэгдүгээр тойрогт Б.Эрдэнэбаяр гоц мөргөн ялалт авсан байгаа. Тэрбээр хоёрдугаар тойрогт Английн Oliver Skort-той таарсан. Түүнийг буулган авч чадвал гуравдугаар тойргийн барилдаанд Орос, Солонгос, Хонконгийн тамирчдын хэн ялсантай барилдана.

“С” хэсгийн нэгдүгээр тойргийн барилдаанд Л.Энхдөл гоц мөргөн ялалт авсан байгаа. Тэрбээр хоёрдугаар тойргийн барилдаанд Азербайжаны Nurlan Osmanov-той таарна. “D” хэсгийн нэгдүгээр тойргийн барилдаанд А.Өсөхжаргал, Испанийн Olalla Aranda-тай барилдана. Түүнийг ялах юм бол хоёрдугаар тойрогт Финландын Valtteri Olin-той хүч сорино.

81 кг-ын жингийн “А” хэсгийн нэгдүгээр тойрогт  Э.Буянцагаан, Ирландын Eoin Flrming-тэй барилдана. Түүнийг буулган авч чадвал хоёрдугаар тойрогт Казахстан, Германы бөхчүүдийн хэн ялсантай таарна.“В” хэсгийн нэгдүгээр тойрогт Б.Баяндүүрэн, Бахрейны Askerbii Gerbekov-той таарсан байгаа. Түүнийг хожих юм бол хоёрдугаар тойрогт Канад, Португалийн бөхчүүдийн хэн ялсан хүч үзнэ.

“С” хэсгийн нэгдүгээр тойрогт Г.Болор-Очир, АНУ-ын Kell Berliner-тэй барилдана. Түүнийг ялах юм бол хоёрдугаар тойрогт Португалийн Joao Fernando-той хүч сорихоор байна. “D” хэсгийн нэгдүгээр тойрогт Б.Батболд, Испанийн Izquieta Mendiola-тай  барилдана. Түүнийг хожвол хоёрдугаар тойрогт Өмнөд Солонгос, Ирландын бөхчүүдийн хэн ялсантай барилдах юм.