МҮОХ-ны ерөнхийлөгч Б.Баттүшиг Монголын таэквондогийн холбооны урилгаар Улаанбаатар хотноо зочилж буй БНСУ-ын Ким Ун Ён спорт хорооны ерөнхийлөгч Жэй Чүнь Чой тэргүүтэй төлөөлөгчдийг ням гарагт хүлээн авч уулзлаа. Уулзалтын үеэр ноён Жэй Чүнь Чой Монгол Улсад таэквондогийн спорт хурдацтай хөгжиж байгааг онцлон тэмдэглээд Монголын таэквондогийн холбоотой цаашид хамтын ажиллагаагаа улам бэхжүүлэхээ илэрхийлэв.

            Мөн түүнчлэн таэквондогийн спортыг ЮНЕСКО-гийн соёлын өвд бүртгүүлэхээр төлөвлөж, аян өрнүүлж байгаа талаар мэдээлэв. Олимпын төрлийн спорт таэквондог хөгжүүлэх, спортоор дамжуулан эв нэгдлийг бэхжүүлэх үйлсэд Ким Ун Ён сантай хамтран ажиллахыг хүсч МҮОХ-ны ерөнхийлөгч Б.Баттүшигийг тус спорт хорооны зөвлөхөөр өргөмжилж, батламжийг гардуулж өглөө.

          Спорт хороог үүсгэн байгуулагч Ким Ун Ён нь БНСУ-ын ҮОХ-ны ерөнхийлөгч, ОУОХ-ны дэд ерөнхийлөгч, Олон улсын таэквондогийн холбооны ерөнхийлөгчөөр ажиллаж байсан спорт олимпизмын зүтгэлтэн юм байна.