Монгол Улсын оюутны аварга шалгаруулах 2023 оны тэмцээний төрөл зай, жин тус бүрд эхний гурван байр эзэлсэн баг, тамирчид, сургууль, хамт олныг хүндэт өргөмжлөл, алт, мөнгө, хүрэл медалиар шагнаж урамшуулсан билээ. Түүнчлэн оюутны УАШТ-ээс шалгарсан баг тамирчдыг БНХАУ-ын Чендү хотноо 2023 оны долдугаар сарын 28-аас наймдугаар сарын 8-ны өдрүүдэд явагдах дэлхийн оюутны спортын зуны XXXI наадамд шалгаруулан оролцуулах эрхийг гардуулан өглөө.

           Мөн волейбол, сагсан бөмбөг 3х3 төрөл, футзал, чөлөөт бөх зэрэг спортын  төрлийн тамирчид нь ОХУ-ын Екатеринбург хотноо 2023 оны наймдугаар сарын 19-31-ний өдрүүдэд болох “Олон улсын оюутны спортын фестиваль”-д тухайн их, дээд сургуулийн нэр дээр оролцуулахаар урилгыг өгсөн юм.  Энэ удаагийн их дээд сургууль, оюутан тамирчдад шагнал гардуулах ёслолын үйл ажиллагаанд Монголын оюутны спортын холбооны ерөнхий нарийн бичгийн дарга, Азийн оюутны спортын холбооны тэргүүн дэд ерөнхийлөгч, Монгол Улсын Гавьяат дасгалжуулагч, доктор, дэд професор Д.Жаргалсайхан, тус холбооны удирдах зөвлөлийн гишүүд болон их, дээд сургуулийн удирдлага, биеийн тамирыг тэнхимийн эрхлэгч, багш нарын төлөөллүүд оролцлоо.

               Ирэх 2024 онд биеийн тамир, спортын тухай хуулийн 17.2 дах заалт, Монгол Улсын Засгийн газрын 2018 оны 183 дугаар тогтоолоор батлагдсан “Улсын хэмжээний спортын наадам зохион байгуулах журам”-ын дагуу “Монгол Улсын оюутны спортын VI наадам” зохион байгуулагдана. Энэхүү наадмыг Олимп, нийтийн биеийн тамир, спортын үндэсний хороо, БТСУХ, МОСХ-ноос хамтран зохион байгуулах юм. Энэхүү наадам нь оюутны дунд 2005, 2009, 2013, 2017, 2022 онд явагдан ийнхүү 2024 оноос эхлэн дэлхийн оюутны универсиадын жишгийн дагуу хоёр жилд нэг удаа Засгийн газраас зохиогдохоор болсон.