Азийн волейболын клубуудын эрэгтэйчүүдийн аварга шалгаруулах тэмцээн Бахрейн Улсын Манама хотноо гурав дахь өдрөө үргэлжилж байна. Тус тэмцээнд өрсөлдөж буй дээд лигийн аварга "Баянхонгор Кроунд Гео" баг  Тайландын лигийн аварга "Диамонд Фүүд" багтай хэсгийн сүүлийн тоглолтоо хийлээ. Тус тоглолтод багаараа нягт сайн тоглож, 3:0-ээр хожсоноор хэсгийнхээ хоёрдугаар байраар шалгаран, цаашид шигшээ наймын шатнаа ахин хэсэгт хуваарилагдан тоглох юм. 

            Энэхүү тэмцээнд "Баянхонгор Кроунд Гео" клубийг төлөөлөн Монголын шигшээ багийн бүрэлдэхүүн тоглож байгаа юм. Тэд эхний тоглолтоо Йемений "Хайпи" клубтэй хийж, эцсийн мөчид 3:2-оор хожигдсон. Мөн хэсгийн хоёр дахь тоглолтодоо Японы лигийн аварга "Сантори Санбирдс" клубт 3:1-ээр хожигдсон ч сүүлийн чухал тоглолтодоо ялж, тус тэмцээний шигшээ наймд шалгараад байна.Тэд дараагийн тоглолтоо хэсгийн шат дууссаны хойно маргааш буюу тавдугаар сарын 18-ны өдөр хийнэ.