Польш Улсын нийслэл Варшав хотод зохион байгуулагдсан “Same Judo Cup 2023” жүдо бөхийн олон улсын өсвөрийн тэмцээнд Монголын жүдо академи амжилттай оролцож арван медальтай хүртжээ.  Тэд таван алт, дөрвөн мөнгө, нэг хүрэл медаль авч эх орондоо ирлээ. Б.Гантогтох багшаар удирдуулсан Жүдо академийн 11 тамирчин энэ сарын 11-ний өдөр эх орноосоо Польш Улсын зүг хүлгийн жолоо залсан юм.

       Тэмцээний эхний өдөр Ц.Түвшинбаяр, М.Мөнх-Оргил, Г.Эгшиглэн, М.Нандин-Эрдэнэ, Э.Цэлмүүн нар тус тус алтан медаль хүртсэн бол Т.Ган-Эрдэнэ, Б.Мөнгөндөл, Ц.Гэгээн нар мөнгөн медаль, П.Азжаргал хүрэл медаль хүртсэн байна. Харин тэмцээний хоёр дахь өдөр З.Буянравших мөнгөн медаль зүүж, Б.Цэрэнпунцаг шагналт тавдугаар байрт шалгарчээ.

        Монголын жүдо академи багийн дүнгээр тэмцээнд оролцсон нийт 104 клубээс тавдугаар байрт эрэмбэлэгдсэн байна.  Тус “Same judo cup”  олон улсын тэмцээн нь энэ жил долоо дахь удаагаа болж байгаа аж. Тэмцээнд 22 орны 1500 гаруй өсвөрийн жүдочид хүч чадал, авхаалж самбаагаа сорин өрсөлджээ.