Спортын гимнастикийн 2023 оны Улаанбаатар хотын аварга шалгаруулах тэмцээний нээлтийн ёслолын ажиллагаа өнөөдөр Монголын гимнастикийн төв зааланд эхэллээ. Тэмцээний нээлтийн ёслолын ажиллагаанд Олон улсын гимнастикийн холбооны Нийтийн гимнастикийн техникийн хорооны дэд ерөнхийлөгч, Азийн гимнастикийн холбооны Нийтийн гимнастикийн техникийн хорооны ерөнхийлөгч, олон улсын эксперт Япон Улсын иргэн ноён Араки Тацүо оролцлоо.

            Мөн Олон улсын гимнастикийн холбооны Нийтийн гимнастикийн техникийн хорооны ерөнхийлөгч асан, Европын гимнастикийн холбооны Нийтийн гимнастикийн техникийн хорооны хүндэт ерөнхийлөгч, олон улсын эксперт, Герман Улсын иргэн ноён Манн Детлеф, Нийслэлийн Биеийн тамир, спортын газрын захиргаа төлөвлөлт, санхүүгийн хэлтсийн дарга М.Цогзолмаа, Монголын гимнастикийн холбооны ерөнхий нарийн бичгийн дарга, ОУХМ, олон улсын шүүгч Г.Ерөөлбат нарын хүндэт зочид оролцов.

             Энэ удаа 65 дахь жилдээ зохион байгуулагдаж буй тэмцээнд долоон багийн 150 гаруй тамирчин өрсөлдөж байна. Тус тэмцээнээс тавдугаар сарын 27-28-нд болох улсын аварга шалгаруулах тэмцээн, зургадугаар сарын 10-18-ны өдрүүдэд Сингапурын Каллан хотод болох Азийн аварга шалгаруулах тэмцээнд оролцох баг тамирчдыг сонгон шалгаруулна.