“Бухарест-2018” чөлөөт бөхийн 23 хүртэлх насны ДАШТ-ий хүрэл, өсвөр үеийн ДАШТ-ий мөнгө, Азийн аваргын мөнгө, хүрэл медальт, насанд хүрэгчдийн УАШТ-ий алт, мөнгө, хүрэл медальт, “Хасу-Мегастарс” клубийн тамирчин, ОУХМ Цогт-Очирын Намуунцэцэгтэй ярилцлаа. Тэрбээр Иван Ярыгиний “Алтан гран при” тэмцээний алт, “Байгаль open”, Болат Турлыхановын тэмцээний алт, Монгол Улсын гурван удаагийн аварга , Токио 2020 олимпын наадмын  тавдугаар байрт шалгарч байсан тамирчин билээ.

-Казахстан Улсын Астана хотод энэ сарын 9-14-ний өдрүүдэд болсон чөлөөт бөхийн Азийн аварга шалгаруулах тэмцээнд барилдлаа. Сугалаа их чанга татлаа шүү. Японы дэлхийн аварга Ремина Ёшимототой таарсан. Өмнөх жилийн Азийн аваргын финалд түүнтэй таарч мөнгөн медаль хүртсэн билүү?

-Энэ жилийн Азийн аварга шалгаруулах тэмцээний эхний тойрогт Японы бөхтэй таарч нэг ч оноо авч чадалгүй ялагдсан .Өмнөх жилийн барилдаанд барилдахад их боломжийн санагдсан л даа гэхдээ энэ жил бодсоноороо барилдаж чадсангүй ээ.

-Японы дэлхийн аварга Ремина Ёшимото ер нь ямар барилдаантай бөх вэ. Түүнээс оноо салгах боломж гарахгүй л байна уу?

-Ер нь бол Ёшимото зайнаас ажилладаг хөл сайн авч барилддаг бөх. Би түүнээс барьц авч барилдвал оноо салгаж чадах байсан. Гэвч хөлд нь ороод буцахдаа хөлдөө алдаад хэрээст мэхэнд ороод нэг дор олон оноо алдаж хожигдсон.

-Хятадын Ziqi FENG-тэй барилдаж байх даа зүүн хөлдөө гэмтэл авсан уу. Тэр өмнөх барилдааны хэрээст мэхнээс болов уу. Хуучин бэртэл сэдэрсэн үү. Одоо хөлийн бэртэл гайгүй юу?

-Зүгээрээ. Хөлдөө ямар нэгэн бэртэл аваагүй.

-Монггол Улсын гавьяат тамирчин, ДАШТ-ий мөнгө, хүрэл медаль Д.Отгонжаргалыг  ялж улсын аварга шалгаруулах тэмцээнд түрүүлсэн. Д.Отгонжаргалтай барилдах арга барилаа олчихсон юм биш үү?

-Би гавьяат Д.Отгонжаргалд 2021 оноос өмнө хожигдож байгаагүй юм. Гэтэл 2021 оны ДАШТ-ий сорил тэмцээнд анх удаа хожигдсон. Дараа нь 2022 оны Азийн аварга шалгаруулах тэмцээний эрх авах тэмцээнд Отгоог хожсон. Түүний дараа 2022 оныхоо улсын аваргад хожигдсон. Харин 2023 оны улсын аварга шалгаруулах тэмцээнд хожсон. Ер нь л  түүнийг ялж, ялагдаад л явж байгаа даа.

-Д.Отгонжаргал гавьяатыг ДАШТ-ээс медаль авсанаас хойш хоёр удаа таарч барилдаад ялаад байна уу?

-Тийм ээ. Отгоог ДАШТ-ээс медаль хүртсэнээс хойш хоёр ялаад байгаа.

 -Ер нь өөрөө том тэмцээнүүдэд чанга сугалаа татах юм аа. Олимпод мөн л хүнд сугалаа татсан.Токио 2020 олимпын наадмын нэгдүгээр тойрогт дэлхийн хошой аварга Японы тамирчин Юүи Сүсакитай барилдсан. Олимпын наадамд барилдах мэдрэмж ямар байсан бэ?

-Сугалаагаар барилдах үе гэж байна. Үүнийг сайн мэддэг хүмүүс л ойлгох байх. Ер нь манайхан чинь хүнийг их харлуулах дуртай. Амжилт гаргахаар нь амаа олохгүй магтаад, тааруухан барилдахаар нь шүүмжилж муу хэлээд байдаг. Олимп, дэлхийн түвшний хэмжээнд очиж чадахгүй байгаа нь миний буруу байх. Олимпын наадамд зөвхөн шилдгүүд л өрсөлддөг гэдгийг мэдэрсэндээ .

 -Олимпын наадмын дагах барилдаанд Эквадорын Люсиа Иедс дэвжээнд гарч  ирээгүй. Тийм болохоор ялалт авч хүрэл медалийн төлөө дэлхийн аварга Азербайжаны бөх Мария Стадниктай барилдаж, тавдугаар байрт орсон шүү дээ?

-Зарим тэмцээнд жин их хасдаг тамирчид, жиндээ орж чадахгүй байх нь бий. Японд жин хасах хэцүү юм билээ. Хөлс гарахгүй шахам, 100 грамм ч хасагдахгүй, хөлс ууршихгүй их сонин. Түүнээс болоод л  Эквадорын бөх жиндээ орж чадаагүй байх. Тэгээд л надад ялалтыг өгсөн. Би Азербайжаны дэлхийн аварга Стадниктай хүрэлийн төлөө барилдсан.

-Азербайжаны Мария Стадник чинь олимпын хошой мөнгө, хошой хүрэл, ДАШТ-ий хоёр алт, гурван мөнгө, нэг хүрэл медальтай бөх  байх аа?

-Тийм ээ .Одоо олимпын тав дахь медалиа авна гэсэн зорилготой явж байгаа юм билээ. Би Парисын 2024 оны олимпод, дэлхийн аварга Стадникаас даагаа нэхэхийг хүсэж байгаа.

-Өөрийг тань “Хасугийн Намуунаа” гээд байдаг. Гэтэл Дарханы хүүхэд биш юм билээ. Хэнтий аймгийн аль сумын уугуул хүүхэд вэ?

-Би Хэнтий аймгийн Хэрлэн сумын Өлзийт тосгоны хүүхэд л дээ.

-Хэзээнээс “Хасу Мегастарс” клубийн тамирчин болж, Ц.Баярсайхан багшийн шавь болов оо?

-2010 оноос хойш гавьяат дасгалжуулагч Ц.Баярсайхан багштайгаа ажиллаж байгаа.

-Өөрийн тань жинд “Хасугийн Отгонцэцэг” гэж ДАШТ-ий мөнгөн медальт, Ази тивийн аварга бөх байсан. Өөрөө Гавьяат Д.Отгонцэцэгийг залгаж гарч ирсэн үү?

-Отгонцэцэг эгч манай жинд барилддаггүй байсан л даа. 51 кг-ын жинд дэлхийн аваргаас мөнгө медаль хүртсэн.  Дараа нь  55 кг-ын жинд хүрэл авч байсан. Харин 2012 оны Лондонгийн олимпод л 48 кг-д орж барилдсан.

-Д.Отгонцэцэгээс хэр их зүйлийг сурч авав?

-Тууштай хичээнгүй зан, тэсвэр хатуужил, их тэвчээрээс нь суралцахыг хичээсэн.

 -Бага насныхаа дурсамжаас хуваалцахгүй юу?

-Би багадаа ер нь эршүүд талдаа охин байсан. Жаахан зожиг гэхүүдээ, дуу цөөтэй, даруухан хүүхэд байсан даа.

 -Хэдий үеэс чөлөөт бөхийг сонирхон хичээллэв?

-Спортын дунд сургуульд ороод л чөлөөт бөхөөр 2008 оноос  эхлэн хичээллэсэн.

 -Өмнө нь өөр спортын төрлөөр хичээллэж байсан уу?

-Үгүй ээ. Чөлөөт бөхөөс өөр спортоор огт хичээллэж үзээгүй.

-Өсвөр үеийн ДАШТ мөнгө, залуучуудын ДАШТ-ээс хүрэл медалийг хэдэн онд хүртэж байсан юм бэ?

-2011онд өсвөрийн дэлхийн аваргаас мөнгө медаль авч байв. Харин 2018 онд “U23” ангиллын ДАШТ-ээс хүрэл медаль хүртэж байсан.

 -Сэтгэлд тань хоногшин үлдсэн хамгийн сайхан барилдаан гэвэл?

-Хамгийн анх удаа тэмцээнд орсон барилдаан л сэтгэлд хоногшин үлдсэн дээ. Тэр тэмцээнд 30 кг-ын жинд орж байсан юм. Нээх томдсон тирко өмсөөд, хоёр мөрийг  дээр нь зангидаж уячихаад дэвжээнд гарсан. Дэвжээн дээр гараад л хөл чичрээд болдоггүй. Тэгээд л өрсөлдөгчийг харж байгаад л давхар хамаад дарсан. Тэр барилдаан ерөөсөө санаанаас гардаггүй юм.

-Энэ жилийн УАШТ түрүүллээ. ДАШТ-д шууд оролцох уу. Сорилт тэмцээн хийх үү?

-Дэлхийн аваргын сорилт тэмцээнийг хийнэ гээд байгаа.

 -Парисын 2024 оны олимпын эрх олгох ямар тэмцээнүүд хүлээж байгаа вэ?

-Энэ жилийн дэлхийн аваргад эхний таван байрт шалгарсан тамирчид олимпын эрх шууд авна. Мөн Азийн эрхийн тэмцээнд эхний хоёр байр, дэлхийн эрхийн тэмцээнд энхий хоёр байрт орсон бөхчүүдэд  олимпын эрх өгнө.

 -Ирэх намар болох Азийн наадамд барилдах уу?

-Азийн наадамд оролцох бөхчүүдийг сорил тэмцээн хийж, тодруулах байх.