Чөлөөт бөхийн насанд хүрэгчдийн Ази тивийн аварга шалгаруулах тэмцээн Казахстан Улсын Астана хотноо болж байна. Эмэгтэйчүүдийн 55 кг-ын жинд “Аваргууд академи”-ийн бөх, спортын мастер Чинболдын Отгонтуяа Азийн аваргад анх удаа зодоглож байгаа юм.

        Тэрбээр дөрөвний нэг шигшээ барилдаанд Вьетнамын Ти Ми Тран Нгеунтэй барилдах ёстой байсан ч өрсөлдөгч нь дэвжээнд гарч ирээгүй учир ялалтыг авсан. Ч.Отгонтуяа дараагийн тойрогт буюу хагас шигшээ барилдаанд дэвжээний  эзэн орон Казахстаны Марина Седневатай барилдав.

       Ч.Отгонтуяа “U23” насны ДАШТ-ий хошой хүрэл медальт эзэн орны Марина Седневаг нутгийн дэвжээн дээр нь 10:0-ээр ялж шигшээд шалгарлаа. Манай бөх орой 20:00 цагаас алтан медалийн төлөө "Токио-2020" олимпын мөнгө, ДАШТ-ий хос хүрэл медальтай БНХАУ-ын Пан Кианутай барилдана.