Монголын шилдэг сагсан бөмбөгчдийн нэг Тунгалагийн Санчирын төрсөн өдөр өнөөдөр тохиож байна.  Тэрбээр  1989 оны дөрөвдүгээр сарын 8-ны өдөр Улаанбаатар хотод төржээ. Баянгол дүүргийн 40 дүгээр дунд сургуулийг төгссөн.

          Т.Санчир 2023 оны Үндэсний дээд лигийн тэргүүн тоглогч буюу “MVP”-ын шагналын эзэн билээ. Үндэсний сагсан бөмбөгийн дээд лигийн гурван удаагийн аварга, дээд лигийн тэргүүн тоглогчоор таван удаа шалгарсан. Финалын үнэ цэнэтэй тоглогчоор хоёр удаа, бүх оддын тоглолтод 15 удаа оролцсон.

           Дээд лигийн “Шилдэг шинэ залуу тоглогч”-оор нэг удаа, дээд лигийн мөнгөн медалийг дөрвөн удаа, хүрэл медалийг хоёр удаа хүртсэн. Үндэсний 21 аймгийн лигийн аваргаар нэг удаа, үндэсний 21 аймгийн лигийн “MVP-Финал”-д нэг удаа шалгарч байсан. Улсын шигшээ багт 15 жилдээ тоглож байгаа.

   Казань оюутны “Универсиад” их наадмын онооны лидер, Инчеон оюутны “Универсиад” их наадмын онооны лидер, Азийн оюутны аварга шалгаруулах тэмцээний хүрэл медальтай. 2025 оны Азийн аваргын урьдчилсан шатанд шигшээ багийн онооны лидер болж байсан шилдэг тамирчин юм.