Унгарын хөл бөмбөгийн “BLSZ II” лигийн “Швабхэдьж” клубт Жавхлангийн Эрдэнэзолбоо хэмээх 20 настай монгол залуу тоглож байна. Тэрбээр анхны тоглолтоо өнгөрсөн бямба гарагт “Нодьжтээ тээне Кухас”-ын эсрэг хийж, 5:1-ээр хожлоо.  Ж.Эрдэнэзолбоо 2012 оноос “Дөчин мянгат юнайтед” клубт дасгалжуулагч Д.Нанжидын удирдлага дор хичээллэн өсвөр үеийнхний УАШТ-д гурван удаа түрүүлж байжээ.

Мөн 2016 онд Монгол Улсын 14 хүртэлх насны шигшээ багийн бүрэлдэхүүнд багтан Зүүн Азийн Фестиваль, 2017, 2019 онд Монгол Улсын 16, 19 хүртэлх насны шигшээ багийн бүрэлдэхүүнд багтсан байна.  Азийн аварга шалгаруулах тэмцээний эрхийн төлөөх тэмцээнд өрсөлдөж, Монголын хөл бөмбөгийн холбооны шугамаар 2018-2019 онд Унгарын домогт хөлбөмбөгч Ференц Пушкашийн нэрэмжит академид суралцсан юм.

Монголдоо эргэн ирж 2020 онд нийслэлийн ерөнхий боловсролын 24 дүгээр сургуулийг төгсөөд Ло́ранда Э́твёшагийн их сургуульд спортын шинжлэх ухаан ба менежментийн чиглэлээр суралцахаар дахин Унгарыг зорьсон байна. Хичээл, ажлын хажуугаар Будапешт хотын 12 дугаар дүүргийн “Швабхэдьж” клубт бэлтгэл сургуулилалт тасралтгүй хийсэн ч албан ёсны тоглолтод оролцох зөвшөөрөлгүй байсан тул зөвхөн нөхөрсөг тоглолтуудад л оролцож байжээ. Харин одоо албан ёсны тоглогч боллоо.