Монголын жүдо академийн тамирчин Т.Анударь, Б.Намуунаа нар мэдлэг боловсролоо дээшлүүлж, жүдо бөхөд мэргэшихээр Япон Улсыг зорилоо. Залуу тамирчид маань Осака мужид байрлах “Киндай” их сургуульд суралцах юм. 1925 онд үүсгэн байгуулагдсан тус сургуулийн төгсөгчдийн дунд дэлхий, олимпын медальтай олон шилдэг тамирчид байдаг билээ.

          2016 онд “Жүдо Академи”-д элсэн орж жүдо бөхийн анхны “А” үсгээ заалгасан Т.Анударь нь 2022 онд Монгол Улсын залуучуудын аваргаар тодорсон билээ. Мөн өсвөр үеийн УАШТ-ий хүрэл, хүүхдийн спортын наадмын самбо бөхийн хүрэл, МУГТ Д.Нармандахын нэрэмжит тэмцээний мөнгөн медалиуд түүний шагналын цуглуулгад байдаг.

        Харин 2016 оноос “Жүдо Академи”-д хичээллэсэн Б.Намуунаа жүдо бөхийн өсвөр үеийн УАШТ-ий хошой хүрэл медальтайгаас гадна самбо бөхийн өсвөрийн УАШТ-аас хүрэл медаль хүртэж байсан юм.Ташрамд дуулгахад “Киндай” их сургуульд “Монголын жүдо академи”-ийн тамирчин, 2022 оны “Улаанбаатар их дуулга”-ын хүрэл медальт, ОУХМ О.Хүслэн мөн суралцдаг билээ.