“Аврагч” спорт хорооны тамирчин Лутсайханы Алтанцэцэг Энэтхэгийн Дели хотноо үргэлжилж буй ДАШТ-ээс мөнгөн медаль хүртэж, эмэгтэй боксчдын түүхэн дэх оргил амжилтын эзэн боллоо. Манай тамирчин энэ тэмцээнд тун одтой тулалдаж,  Франц, БНХАУ, Узбекистан, Мароккогийн тамирчдыг дараалан 5:0-ээр ялж, аваргын төлөө өрсөлдөхөөр шалгарсан.

         Түүний өрсөлдөгч нь ДАШТ-ийг зохион явуулж буй эзэн орны боксчин, залуучуудын дэлхийн хошой аварга, хамтын нөхөрлөлийн орнуудын наадмын аварга Ниту Гангас байв. Тулаан эн тэнцүүхэн өрнөсөн бөгөөд гурван үеийн тулааны дараа шүүгчид эзэн орны боксчинд ялалтыг өгсөн юм. Ийнхүү Монгол Улсын эмэгтэйчүүдийн баг, тамирчид энэ удаагийн ДАШТ-ийг мөнгө, хүрэл медаль хүртсэн амжилтаар өндөрлүүлж байна.