Шайбтай хоккейн Ази Номхон далайн орнуудын “U18” насны ангиллын "Challenge cup" тэмцээн гуравдугаар сарын 11-17-ны өдрүүдэд Монгол Улсын нийслэл Улаанбаатар хотод боллоо. Тус тэмцээнд Монгол, Иран, Туркменистан, Тайланд, АНЭУ, Узбекистан гэсэн зургаан орны баг тойргоор өрсөлдөж Монгол Улсын шигшээ баг хүрэл медаль хүртэж нутгийн хөгжөөн дэмжигчдээ баярлуулав.

       Дөрвөн тоглолтоос хоёр хожил, хоёр хожигдолтой явсан Монголын баг өчигдөр "Мөсөн өргөө"-д сүүлийн тоглолтоо Тайланд Улсын шигшээ багтай хийсэн. Хожсон нь хүрэл медаль хүртэх байсан тус тоглолтод манай тамирчид 1:4-өөс гайхалтай эргэн ирэлт хийж дараалан таван шайбаар өрсөлдөгчийнхөө хаалгыг мялааснаар 6:4-өөр ялалт байгуулж монголчуудаа баярлуулав. Манай багаас М.Чинзолбоо гурав, А.Билгүүн хоёр, У.Цэнгэл нэг гоол оруулж багийнхаа ялалтад үнэтэй хувь нэмрийг орууллаа.