Чөлөөт бөхийн бөхийн 2023 оны УАШТ болж өндөрлөв. Энэ удаагийн улсын аваргын эмэгтэйчүүдийн 55 кг-ын жинд түрүүлсэн Баянгол дүүргийн “Аваргууд академи”-ийн залуу тамирчин Чинболдын Отгонтуяатай ярилцлаа.  

-Чөлөөт бөхийн насанд хүрэгчдийн 2023 оны УАШТ-ий 55 кг-ын жингийн аварга болсонд баяр хүргэе. Алтан медалийн төлөөх барилдаанд “Хангарьд”-ын Батбаатарын Энхцэцэгтэй хэр ширүүн өрсөлдөөнийг өрнүүлэв ээ?

         -Бид хоёр оюутны их наадмын аваргын төлөө барилдаж, би ялж байсан. Саяхан болсон Иван Ярыгины “Алтан гран при” тэмцээнд  би 4:2-ын харьцаатай хожигдсон. Бид хоёрын ялалт, ялагдлын харьцаатай 1:1 болж тэнцсэн юм. Харин би  сая насанд хүрэгчдийн улсын аваргын тэмцээнд 10:0-ийн харьцаатай оноогоор цэвэр ялж, ялалт авч чадлаа. Ер нь бол бид тэнцүүхэн, ширүүн өрсөлдөгчид шүү.

       -Танай жинд Пүрэвтунгалаг, Энхцэцэг хоёр харьцангүй чацтай, өндөр тамирчид харагдлаа. Өөрөөсөө өндөр бөхчүүдийг ямар тактикаар барилдаж ялав. Улсын аваргад түрүүлнэ гэдэгтээ хэр итгэлтэй байсан бэ?

          -Багш нарынхаа хэлснийг сайн сонсож бэлтгэл дээр давтдаг зүйлсээ хийж барилдсан. Энэ удаа бэлтгэл сургуулилалт, сэтгэл санааны хувьд үнэхээр сайн байлаа.

 -Энэ жилийн УАШТ-д хэдэн барилдаан хийж түрүүлэв. Хамгийн хүнд барилдааныг хэнтэй хийсэн бэ?

           -Энэ жилийн улсын аваргад гурван барилдаан хийж түрүүлсэн. Хамгийн хүнд барилдаан гэвэл аваргын төлөөх барилдаан байсан даа. Ер нь барилдаан бүхэн ширүүн өрсөлдөөнтэй, анхаарал хариуцлага шаардаж байлаа.

-Насанд хүрэгчдийн УАШТ-д хэд дэх жилдээ оролцож байна. Өмнөх жилүүдэд ямар амжилт гаргаж байсан бэ?

         -Улсын аваргад дөрөв дэх удаагаа оролцож байна. Насан хүрэгчдийн улсын аварга шалгаруулах тэмцээнээс  2019, 2021 онд хүрэл,  мөн 2022 онд хүрэл медаль хүртэж байлаа. Харин энэ жил  2023 онд  улсын аварга болж, алтан медаль авч чадлаа.

 -Танай 55 кг-ын жинд шинэ залуу тамирчид медаль хүртлээ. ОУХМ Г.Отгонжаргал өмнөх жилийн УАШТ-ий 55 кг-ын түрүүлсэн билүү?

       -Тийм ээ. Өмнөх жил ОУХМ Г.Отгонжаргал эгч манай жинд түрүүлж байсан.

 -Миний дүү өөрийгөө танилцуулахгүй юу. Аль аймгийн уугуул хүүхэд вэ. Одоо хэдэн настай, аль сургуулийн оюутан бэ?

           -Намаиг Чинболд овогтой Отгонтуяа гэдэг. Саяхан 22 нас хүрсэн. Би  Дорноговь аймгийн Сайхандулаан сумын харьяат. Одоо ҮБТДС-д суралцаж байгаа.

 -Айлын хэд дэх хүүхэд вэ. Гэр бүлээ танилцуулахгүй юу?

     -Манайх ам бүл тавуулаа. Би хамгийн бага нь, дээрээ хоёр ахтай. Аав, ээж маань хөдөөнөө амьдарч байгаа.

 -Чөлөөт бөхийн спортыг яагаад сонгож хичээллэх болов?

         -Би багаасаа л хөдөлгөөнтэй, гүйж, харайсан хүүхэд байсан. Хоёр ах маань барилддаг байлаа. Тэгээд л надад тэд их нөлөөлж, чөлөөт бөхийн спортыг сонирхож эхэлсэн.

 - Хэн багшийн шавь бэ. Чөлөөт бөхөөр хэд дэх жилдээ хичээллэж байгаа вэ?

       -Анхны багш гэвэл спортын мастер Сугарын Сайнбаяр, А.Зоригбаатар нар. Хоёр багш маань Дорноговийн БТСХ-д багшилдаг. Харин одоо би МУГТ Цэрэнбаатарын Цогтбаяр. МУГД.Цэрэнбаатарын Хосбаяр, МУГТ Баяраагийн Наранбаатар, МУГТ Бадрахын Одончимэг, МУГТ Ганзоригийн Мандахнаран, ОУХМ Лхамгармаа багш нарын удирдлага дор бэлтгэл сургуулилалтаа хийж байгаа.

-Гэр бүлд нь спортоор хичээллэдэг хүн бий юу. Ер нь бөхийн спортыг яагаад сонирхон хичээллэх болов?

      -Ах нар маань барилддаг байсан. Анх бөхийн секц, дугуйланд байрныхаа найзыг дагаж яваад, чөлөөт бөхөд  дур, сонирхолтой болсон. Тэр үед аав, ээждээ “Давтлагандаа явлаа” гэж хэлээд нууцаар бэлтгэлдээ явдаг байв. Тэгсэн гэнэт л нэг өдөр баригдаж, загнуулсан.  Охин хүүхдэд бөхийн спорт таарахгүй гэв. Би гурав хоног уйлсан. Тэгээд ээжтэйгээ нэг болзол тавьж, тэмцээнд оролцох болов. Тэр тэмцээнээс медаль авах юм бол бэлтгэлд явуулна, медаль авахгүй бол секцэнд явахгүй болино гэлээ. Ингээд л  “Налайхын цом”  олон хотын тэмцээнд оролцож мөнгөн медаль аваад, бөхийн секцэнд явах  эрхээ батлгаажуулж билээ.

 -Чөлөөт бөхөөр хичээллэсэн үеэс хойших томоохон амжилтууддаа дурдахгүй юу?

        -Өсвөр үеийн УАШТ-ээс 2014 онд хүрэл медаль. 2015 онд алт медаль. 2016 онд мөнгө медаль. 2018 онд хүрэл медаль хүртэж байсан. Харин залуучуудын улсын аварга шалгаруулах тэмцээнээс 2019, 2020, 2021, 2022 онд дараалан дөрвөн алтан медаль авсан.  Насанд хүрэгчдийн улсын аварга шалгаруулах тэмцээнээс 2019, 2021 онд хүрэл медаль, 2022 онд бүх ард түмний их наадмаас алтан медаль, 2022 онд оюутны их наадмаас алтан медаль хүртсэн. 2023 онд насанд хүрэгчдийн УАШТ-ээс алтан медаль хүртсэн амжилт гаргаад байна.

 -Сэтгэлд тань хоногшин үлдсэн хамгийн сайхан барилдааныг хэзээ хийж байв?

          -2019 онд насанд хүрэгчдийн улсын аваргын хүрэл медалын төлөө барилдсан, барилдаан маань сэтгэлд үлдсэн хамгийн дурсамжтай санагддаг. Энхний барилдаанд гараад шууд цэвэр ялалт авч маш их баярлаж билээ. Тэр ялалтаас их урам, сэтгэл орж, өөртөө итгэх итгэл минь сэргэсэн.

-Чөлөөт цагаараа бөхөөс гадна өөр юу хийх дуртай вэ?

           -Чөлөөт цаг гарвал хөөрөгний даалин оёдог. Ихэнхдээ л гадаадын шилдэг бөхчүүдийн барилдааны бичлэг үзэх дуртай.

 -Ирээдүйн зорилго, мөрөөдлөөсөө хуваалцахгүй юу?

         -Мэдээж миний зорилго бол олимп, дэлхийн аварга болж, багш нараа, гэр бүлээ баярлуулах. 2018 оноос хойш миний ялалт, ялагдал бүхэнтэй минь цуг байж, цаг ямагт ар талд минь найдвартай зогсож  буй “Номт Даншиг”  компанийн захирал Б.Баттулга ахад их баярлаж явдаг.  Намайг дэмжиж тусалдаг бүх хүмүүсээ амжилт гаргаж баярлуулахыг хүсэж байна даа.