Монгол улсын Ардын багш, Монгол Улсын гавьяат дасгалжуулагч, Хангайн Намширын нэрэмжит Монголын хүүхдийн спортын VII наадмын чөлөөт бөхийн дүүргийн аварга шалгаруулах  Хан-Уул дүүргийн тэмцээн энэ сарын 6-ны өдөр Хан-Уул дүүргийн Биеийн тамир, спортын хорооны зааланд зохион байгуулагдаж аваргуудаа тодрууллаа.

        Тэмцээний нээлтийн үйл ажиллагаанд Хан-Уул дүүргийн Засаг даргын зөвлөх Ч.Бат-Оргил, Хан-Уул дүүргийн Биеийн тамир, спортын хорооны дарга Д.Жаргалсайхан, Монгол Улсын Ардын багш, гавьяат дасгалжуулагч Х.Намшир, Монгол улсын Ардын багш, гавьяат дасгалжуулагч, “XX зууны шилдэг шүүгч” А.Басхүү, Монгол Улсын Ардын багш З.Дүвчин, Монгол Улсын Хөдөлмөрийн баатар, гавьяат тамирчин З.Ойдов, Ардын багш, гавьяат дасгалжуулагч Ч.Дамдиншарав нар болон Х.Намшир багшийн үе үеийн шавь нарын төлөөлөл оролцлоо.

        Тэмцээнийг нээж Хан-Уул дүүргийн Засаг даргын зөвлөх Ч.Бат-Оргил үг хэлж нийт багш, дасгалжуулагч, тамирчдад амжилт хүсч, баяр хүргэлээ, Х.Намшир хүрэлцэн ирсэн хүндэт зочид, үе үеийн шавь нар, тэмцээнд оролцож буй баг, тамирчдад талархлын үг хэллээ.

         Тус тэмцээнийг МЧБХ-ны ерөнхий менежер, олимпын зэрэглэлийн шүүгч Б.Алтангадас, олон улсын шүүгч П.Батбаатар, Жаргалсайхан, Урианхай, улсын шүүгч Хажымхан нарын Монголын чөлөөт бөхийн холбооноос томилогдсон шилдэг шүүгчид шүүж явууллаа. МУАБ, МУГД Х.Намширт Хан-Уул лүүргийн Биеийн тамир, спортын хорооны хамт олон болон, үе үеийн шавь нараас хүндэтгэл үзүүлж дурсгалын зүйл гардууллаа.

            Тэмцээнд есөн байгууллагын 200 гаруй тамирчин, охидын найман жин, хөвгүүдийн 12 жинд хүч сорин өрсөлдсөнөөс байгууллагын нэгдсэн дүнгээр охидын төрөлд тэргүүн байранд В.Мөнхдалай дасгалжуулагчтай 59 дүгээр сургууль, дэд байранд  Б.Сэр-Од дасгалжуулагчтай 26 дугаар сургууль, гуравдугаар байранд Э.Ихбаяр дасгалжуулагчтай “Аварга” сургууль орлоо.

          Хөвгүүдийн төрөлд тэргүүн байранд Э.Ихбаяр дасгалжуулагчтай “Аварга” сургууль, дэд байрт Б.Сэр-Од дасгалжуулагчтай 26 дугаар сургууль, гуравдугаар байранд В.Мөнхдалай дасгалжуулагчтай 59 дүгээр сургуулийн баг тус тус шалгарч жин тус бүрт аварга болсон тамирчид Монголын хүүхдийн спортын VII наадмын шигшээ тэмцээнд Хан-Уул дүүргээ төлөөлн оролцох эрхээ авлаа. Шилдэг хоёр тамирчинг тодруулж цом, дурсамж, мөнгөн шагналаар шагнав. Охидоос 26 дугаар сургуулийн тамирчин Б.Мөнхномин, хөвгүүдээс “Аварга” сургуулийн тамирчин М.Амартүвшин нар шалгарлаа.