Монгол Улсын байт харвааны 15 дахь удаагийн заалны улсын аварга шалгаруулах тэмцээн энэ сарын 23-26-ны өдрүүдэд Орхон аймагт болох гэж байна.  Тэмцээнийг Орхон аймгийн Засаг даргын Тамгын газар, Монголын байт харвааны холбоотой хамтран зохион байгуулах бөгөөд аймгийн Засаг даргын захирамжаар ажлын хэсэг байгуулагдаж бэлтгэл ажилдаа ороод байгаа аж. Ажлын хэсгийг аймгийн Засаг даргын орлогч А.Түвшинжаргал ахалж байна. 

     Байт харвааны заалны Улсын аварга шалгаруулах тэмцээн энэ жил рекувр болон компаунд төрлүүдээр  “U14”, “U18”, “U21” нас, насанд хүрэгчид гэсэн ангиллаар болно. Тэмцээн нийт 20 гаруй байгууллага, клубийн 295 тамирчин мэдүүлгээ өгч, бүртгүүлээд байгаа гэнэ.  Бүртгэл энэ сарын 13-ны өдөр хаагдах юм байна. 

      Энэ жилийн хувьд өмнөх жилүүдээс харьцангуй олон тамирчин оролцох урьдчилсан статистик гарч байгаа тул Монголын байт харвааны холбооны зүгээс тэмцээний үеэр тамирчиддаа чиглэсэн сургалтыг явуулахаар төлөвлөжээ. Тэмцээний техникийн зөвлөгөөн энэ сарын 22-ны өдөр 17:00 цагт Орхон аймагт болно.