Монголчууд бид эрт, эдүгээгийн уламжлалт түүх, соёлын өвөө сэргээн таниулах ажлыг идэвхтэй хийдэггүй. Түүх, домгийн арвин их баялгийг хадгалж үлдсэн хүн чулуу, дөрвөлжин булш, хадны зургуудыг залуус үл сонирхох бөгөөд түүний талаар тодорхой мэдлэггүй байдаг. Энэ цагт иргэдийн мартсан соёлын дурсгалт өвийг сэргээн сануулж, таниулах зорилгоор уран бүтээлч Д.Амараа “Хаадын хөрөг” гэрэл зургийн үзэсгэлэнгийнхээ нээлтийг Г.Занабазарын нэрэмжит дүрслэх урлагийн музейд өчигдөр хийлээ. Тэрбээр Сүхбаатар аймгийн Дарьганга сумын уугуул. Тиймээс ч нутгийн зон олон нь өнөөг хүртэл хүн чулууг тахиж, наадам хийх соёлыг хадгалан үлдсэн тухай дурдсан юм.

Нутгийнхан хүн чулууг “Хөрөг чулуу” хэмээн нэрлэдэг аж. Дундад зууны үед хамаарах хүн чулууны гэрэл зургийн үзэсгэлэнгээ нутгийнхныхаа хэлж заншсанаар хөрөг буюу “Хаадын хөрөг” гэж нэрлэжээ.. Уран бүтээлч Д.Амараа “Хөрөг чулуу бол тал нутгийн тамга” хэмээсэн. Тэрбээр олон жилийн турш бодож явсны дүнд сүүлийн хоёр жил Монгол Улсынхаа тал нутгийг тойрон аялж, судалгаа шинжилгээ хийхийн зэрэгцээ ӨМӨЗО-ы Шилийнгол аймгийн тал нутгаар хайгуулаа үргэлжлүүлжээ.

Ноёд, ихэс дээдсийн төрхтэй, дахин давтагдашгүй ур хийцтэй эдгээр хүн чулуу бусдаасаа олон төрлийн онцлогтой. Тухайлбал, Дарьгангын Ламтын дөш хэмээх уулын ойролцоох хоёр чулуун хөрөг нь исэрт тухалсан, өргөн шилтэй, урт залаатай малгай, ташуу энгэрт дээл, ямба идээний цом баруун мутартаа барьсан зэрэг нь хаад ихсийн шинжтэй байдаг байна. Энэ үзэсгэлэнгээрээ тэрбээр залуу үедээ соёлын өв болох хүн чулуугаа хэрхэн хамгаалах талаар таниулан сурталчлах зорилготой. “Үүнийг мэдсэн иргэд хүн чулууг эвдэж, сүйтгэхгүй байгаасай гэж хүсэж байгаа” гэж хэллээ. “Хаадын хөрөг” үзэсгэлэнд буй гэрэл зургуудийн дор богино мөртэй шүлгүүд бий. Уран бүтээлч Д.Амараа тухайн шүлгүүдийг өөрөө бичиж, үзэгчдэд зориулан илүү бодит, амьтай мэдрэмж өгөхийн тулд гэрэл зургуудын хамт байрлуулсан гэнэ. Уг үзэсгэлэнд 50 орчим гэрэл зураг, 10 гаруй судалгааны гар зураг багтжээ. Тухайн зургуудаа үзэсгэлэнд дэлгээгүй 70 гаруй гэрэл зурагтайгаа нийлүүлж, зурагт ном бүтээнэ гэв. Мартагдах дөхсөн түүх, домгийн арвин соёлыг сэргээн таниулж буй уран бүтээлч Д.Амараагийн “Хаадын хөрөг” үзэсгэлэн 10 хоног үзэгч олонд хүрэх юм.