Европын холбоо Беларусьт хориг тавина 

Европын холбооны орнуудын удирдагч нар Беларусийн эрх баригчдын эсрэг хориг арга хэмжээ авах талаар хэлэлцэж зөвшилцсөн байна. Евро зөвлөлөөс гаргасан хоригийн санал нь Беларусийн Ерөнхийлөгчийн сонгуулийн дүнг будлиантуулсан, хүний эрх зөрчсөн өндөр албан тушаалтнуудад хамаарч байгаа юм. 
Хоригт өндөр албан тушаал хашдаг 40 түшмэл, сайд багтсан агаад хүний эрх, эрх чөлөөг боомилдог гэсэн шүүмжлэлд хамгийн их өртдөг Ерөнхийлөгч Александр Лукашенког тус жагсаалтад оруулаагүй аж. Энэ талаар Францын Төрийн тэргүүн Эммануэль Макрон хэлэхдээ А.Лукашенког хоригт багтаавал Европын холбооны Аюулгүй байдал, хамтын ажиллагааны байгууллага болон Беларусийн эрх баригчдын хоорондын хэлэлцээрт саад учирч магадгүй гэжээ. 

А.Навальный: Би В.Путинд бэлэг баримааргүй байна 

Оросын сөрөг хүчний улстөрч Алексей Навальный Германы “Шпигель” сэтгүүлд ярилцлага өгсөн байна. Өдөр ирэх бүр түүний бие сайжирч, хэн нэгний тусламжгүйгээр  тавдугаар давхар руу гарч чадах болсноо тэрбээр ярилцлагын үеэр мэдэгджээ. Берлинд байр хөлслөн эхнэр, хүүтэйгээ амьдарч байгаа А.Навальный “Новичок”-т хордсон тухайгаа Оросын эрх баригчид, Ерөнхийлөгч В.Путинтэй холбоотой гэж үзэж байгаа бөгөөд өөрийг нь хордуулах ямар нэгэн шалтгаан үүнээс өөр байхгүй гэж үзэж буй. А.Навальный Беларусийн эсэргүүцлийн хөдөлгөөн, Хабаровскийн жагсаалын талаар байр сууриа идэвхтэй илэрхийлэх болсон нь эрх баригчдад таалагдаагүй гэнэ.  Мөн Берлинд эмчилгээгээ дуусгаж, биеэ тэнхрүүлсний дараа А.Навальный эх орондоо буцахаар төлөвлөж байна. “Хэрэв би эргэж очихгүй бол В.Путиний хүсэл биелж байна гэсэн үг. Би түүнд тийм бэлэг баримааргүй байна” гэж тэрбээр ярьжээ.