Англи: Торгуулийг чангатгав 
Англид өөрийгөө тусгаарлах дэглэмийг зөрчсөн хүмүүст ногдуулах торгуулийг чангатгаж байна. Өнгөрсөн даваа гарагаас эхлэн “Covid-19” шинж тэмдэг илэрсэн хүн гэрээс гарч, олон нийтийн газраар явсан тохиолдолд 1000 хүртэлх фунтийн торгууль төлнө. Мөн дахин ийм зөрчлийг гаргасан бол 10 мянган фунтээр торгох гэнэ. Их Британийн Шотланд, Уэльс, Умард Ирланд зэрэг бүсэд ч мөн ийм арга хэмжээ авахаар төлөвлөж байна. 

Манаус: Наран шарлагын газрыг хаалаа 

Бразилд коронавирусийн халдвар дахин тархаж буйтай холбоотойгоор Манаус хотын захиргаа наран шарлагын газар, далайн эргийн амралтын цэгүүдийг хаах шийдвэр гаргалаа. Өнгөрсөн дөрөв, тавдугаар сард тус хотод коронавирусийн халдвар гарч, 1.8 сая хүнтэй хотын оршин суугчдын 66 хувьд нь коронавирусийн эсрэг биет илэрсэн тухай “medRxiv” цахим хуудсанд мэдээлж байв. Гэсэн ч сүүлийн хэд хоногт халдвар дахин тархаж буй тул олон нийтийг хамарсан үйл ажиллагааг 30 хоногийн хугацаатайгаар хориглож, дэлгүүр, зоогийн газрын ажиллах цагийг хязгаарлажээ. 

Бээжин: Эмч, мэдээлэгчдийг хамгаална  

БНХАУ-ын нийслэл Бээжин хотын захиргаа халдварт өвчин, болзошгүй эрсдэл, аюулын талаар мэдээлсэн эмч, мэдээлэгчдэд шагнал олгох, тэдэнд хууль зүйн дэмжлэг үзүүлэх шийдвэр гаргалаа. Мөн Шэньжэнь хотын захиргаа ч ийм шийдвэр гаргасан байна. Ухань хотод коронавирусийн халдварын тухай анх мэдээлсэн Ли Вэнлиань эмчийг цагдан байцаасан, эрхийг нь зөрчсөн тохиолдол гарсан бөгөөд эмч өнгөрсөн хоёрдугаар сард халдварын улмаас нас барсан юм . 

Энэтхэг: Халдвар авсан хүний тоо зургаан саяд хүрлээ 

Энэтхэгт коронавирусийн халдвар авсан хүний тоо зургаан саяд хүрсэн бөгөөд сүүлийн хэдэн хоногт 82 мянган шинэ тохиолдол бүртгэгдээд байна. Оношилгоо, эмнэлгийн үйлчилгээний хүртээмж муу тул халдвар авсан, нас барсан хүний тоо үүнээс ч их байх магадлалтайг судлаачид анхааруулж байна.