Томуугийн эсрэг 545 мянган тун вакцин захиалжээ

2022-10-12, 335

2022-2023 оны өвөл дэлхий даяар томуугийн өвчлөлийн давлагаа үүсэх эрсдэл үүссэнийг олон улсын судлаачид анхааруулж буй. Цар тахлын дараагаар томуугийн тандалт, сэргийлэлтийг шинэ түвшинд гаргахаар “Томуугийн үндэсний аравдугаар зөвлөгөөн”-ийг “Томуу, коронавируст халдварын харуулдан тандалтыг бэхжүүлэх, салбар хоорондын оролцоог нэмэгдүүлэх, тоон мэдээний чанарыг сайжруулах” зорилгын хүрээнд энэ сарын 12-14-нд зохион байгуулж байна.

Түүнчлэн өвчлөлийн өнөөгийн байдал, хариу арга хэмжээ, цаашид баримтлах стратеги, улирлын томуу, томуугийн хүндрэлийн үнэлгээний дүнд үндэслэн шийдвэр гаргах чадавхыг сайжруулах зэрэг сэдвийн хүрээнд зохион байгуулах юм.Томуугийн улирлыг угтуулан 2019-2021 онд томуугийн эсрэг 649.560 тун вакциныг бага насны хүүхэд, эрүүл мэндийн байгууллагын эмч, эмнэлгийн ажилчид, жирэмсэн болон 65-аас дээш насны ахмад, архаг хууч өвчтэй хүн амыг дархлаажуулалтад хамруулж байсан.

Тэгвэл энэ жил 545,000 тун вакциныг захиалж, вакцинжуулах бэлтгэл ажлыг хангаад байна. Мөн сэргийлэлт ба тандалтыг ДЭМБ шинэ зөвлөмжийн дагуу хийхээр Эрүүл мэндийн сайдын тушаал гарсан юм.Иймээс томуугийн дэгдэлтийн үед нийгмийн эрүүл мэнд, эмнэлгийн тусламж, үйлчилгээ, хилийн нэвтрэх цэгийн бэлэн байдал, хариу арга хэмжээний сургамж бусад салбарын хамтын оролцоог нэмэгдүүлэх чиглэлээр мэдээлэл солилцох, туршлагаа хуваалцах, цар тахлын алдаа оноог томуутай тэмцэхэд ашиглах зэрэг асуудлыг хэлэлцэн зөвлөлдөж байна.

Эрүүл мэндийн яам, Халдварт Өвчин Судлалын Үндэсний Төв, Томуугийн Үндэсний Төвөөс томуу, коронавируст халдварын харуулдан тандалтыг бэхжүүлэх, салбар хоорондын оролцоог нэмэгдүүлэх зорилгоор уг зөвлөгөөнийг зохион байгуулж буй.

Зөвлөгөөний нээлтийн үйл ажиллагаанд ЭМЯ-ны Төрийн нарийн бичгийн дарга Ц.Эрдэмбилэг, ХӨСҮТ-ийн Ерөнхий захирал Ц.Билэгтсайхан, ДЭМБ-ын Монгол дахь Суурин төлөөлөгчийн газрын Гамшиг, нийгмийн эрүүл мэндийн ноцтой байдлын асуудал хариуцсан мэргэжилтнүүд, ХӨСҮТ-ийн мэргэжилтнүүд болон орон нутгийн ЗДТГ болон ЭМГ, НЭ 400 гаруй төлөөллүүд оролцов.

Эх сурвалж: ЭМЯ

Томуугийн эсрэг 545 мянган тун вакцин захиалжээ

Шинэ мэдээ

Нийтлэлчид