Монгол хүн анх сансарт ниссэний 40 жилийн ой тохиож байна. Одоогоос 40 жилийн өмнө буюу 1981 оны энэ өдөр Байконурын сансрын буудлаас Монгол Улсын иргэн, сансрын нисгэгч Ж.Гүррагчаа ЗХУ-ын сансрын нисгэгч Владимир Жанибековын хамтаар “Союз-39” хөлгөөр сансарт хөөрч, “Салют-6” сансрын станцтай холбогджээ. Ж.Гүррагчаа, В.А.Жанибеков нар сансарт долоо хоног, 20 цаг 42 минутыг өнгөрүүлж, дэлхийг нийт 124 удаа тойрсон бөгөөд 1981 оны гуравдугаар сарын 30-нд эх дэлхийд амжилттай газардсан юм.

 Монгол түмний хайрт хүү Ж.Гүррагчаа 1947 оны арванхоёрдугаар сарын 5-нд Булаг аймгийн Гурванбулаг суманд Б.Жүгдэрдэмидийн ууган хүү болон мэндэлсэн. Тэрбээр багадаа ном унших, зураг зурах дуртай, техник хэрэгсэлд ихээхэн сонирхолтой нэгэн байсан гэдэг. Мөн түүний бага насны тухай найз нөхөд нь “Багаасаа л од мичид рүү тэмүүлсэн хүү байсан даа” хэмээн дурсдаг  тухай Ж.Гүррагчаа гуай өөрөө ярьж байлаа.

Ж.Гүррагчаа 1966 онд цэргийн албанд татагдаж, 1971 онд ЗХУ-ын Фрунзе хотын нисэхийн дамжаанд нисэх онгоцны радиоэлектрон төхөөрөмжийн 8796 механикч мэргэжил эзэмшиж, 1973 онд Москва хотод Жуковскийн нэрэмжит Агаарын цэргийн академид суралцаж төгсчээ. Улмаар 1978 оноос Юрий Гагарины нэрэмжит сансрын нисгэгчдийг бэлдэх төвд “Союз-39” хөлгийн нисгэгчээр өөрийн найз, Хөдөлмөрийн баатар М.Ганзоригийн хамт бэлтгэгдэж эхэлсэн түүхтэй.

Түүнийг сансарт нисэхээр болоход нь ээж нь 10 төгрөг өгсөн гэдэг. Ж.Гүррагчаа ээжийнхээ өгсөн 10 төгрөг, аавынхаа хаш хөөрөг, БНМАУ-ын маршал Ю.Цэдэнбалын зургийг авч, сансарт хөөрсөн талаараа нэгэн ярилцлагадаа дурдаж байв.

Сансарт ниссэн Ази тивийн хоёр дахь, дэлхийн 101 дэх хүн болж сансар судлалын түүхэнд нэрээ дуурсгасан Ж.Гүррагчаа монгол хүн бүрийн сэтгэлд хоногшиж, чихэнд нь сургаа дуулгасан, сансарт нисэх, нисгэгч болох мөрөөдөлтэй олон хүүхэд, залуусын “далавч” нь болж яваа билээ.

Тэрбээр БНМАУ, ЗХУ-ын баатар цолтой бөгөөд гуравдугаар сарын 16-нд ОХУ-ын Ерөнхийлөгч Владимир Путины зарлигийн ОХУ-ын Төрийн хамгийн дээд шагнал болох Александр Невскийн одонгоор шагнуулсан юм.