1973 онд “Моторолла” брендээс анхны гар утсыг зохион бүтээснээс хойш өнөөг хүртэл гар утасны загварууд хурдацтай өсөн нэмэгдэж байгаа билээ. Жил бүр хэдэн саяараа үйлдвэрлэгдэх гар утаснуудад тогтсон үнэ бий. Мөн хөрөнгөтнүүдэд зориулсан чамин хээнцэр, үнэтэй гар утаснуудыг үйлдвэрлэдэг. “Эргэлт.мн” сайтаас хамгийн үнэтэй 10 гар утсыг танилцуулж байна.

10.Virtue Signature Cobra

Дэлхий дээрх хамгийн үнэтэй гар утаснуудын нэг болох энэ утас нь 310 мянган ам.долларын үнэтэй. Их Британид үйлдвэрлэсэн уг гар утсыг Францын үнэт эдлэлийн компаниас дизайныг нь бүтээж, үнэт эдлэлүүд суулгажээ. Алтаар бүрхэж, 4039 бадмаараг, хоёр маргад эрдэнээр чимэглэсэн энэ гар утас дэлхийд найман ширхэг байдаг аж.

9.Goldvish Revolution

Цагаан болон ягаан алтаар чимэглэж, нарийн арьсаар бүрхсэн, алмааз болон индранилийн хольцтой дэлгэц бүхий уг гар утас 488 мянга 150 ам.долларын үнэтэй юм.

8.Gresso Luxor Las Vegas Jackpot

Нэг сая долларын үнэ бүхий уг гар утасны гадаргууг 45.5 каратын 100 грамм цэвэр алт болон хар алмаазаар бүтээсэн. 32 каратын эрдэнийн индранилаар товчлууруудыг нь чимэглэжээ.

7.Goldvish Le Million

Нээлтээ хийсэн даруйдаа дэлхийн хамгийн үнэтэй, тансаг гар утас хэмээн цоллуулж байсан уг гар утас өдгөө нэг сая долларын үнэтэй. 18 каратын цагаан алт, VSS-1 зэрэглэлийн алмазыг өөртөө шингээсэн тансаг гар утас нь дэлхийд гуравхан бий.

6.Diamond Crypto Smartphone

50 ширхэг алмаз өөртөө агуулахын зэрэгцээ 10 ширхэг ховор төрлийн цэнхэр алмазыг ч мөн агуулсан уг гар утас 1.3 сая ам.доллараар үнэлэгддэг. Дизайнер Алоисон гадаргууг нь цагаан алтаар хучиж, голын товчлуурыг нь ягаан алтаар чимэглэсэн юм.

5.iPhone 3G Kings Button

Австралийн дизайнер Питер Алиссон 18 каратын цагаан, шар, ягаан алт болон 1038 алмааз ашиглан бүтээсэн уг гар утас 2.5 сая ам.долларын үнэтэй. Гол товчлуурыг нь 6.6 каратын алмаазаар бүтээсэн юм.

4.Goldstriker iPhone 3GS Supreme

3.2 сая ам.долларын үнэтэй уг гар утасны зөвхөн хүрээг нь л гэхэд 1036 алмаазаар урлаж, брендийнх нь логог 171 грамм 22 каратын алтаар бүрхсэн аж. Голын товчлуур нь 7.1 каратын алмааз бөгөөд дээд зэрэглэлийн шир, боржин чулуу зэргийг агуулсан нь дэлхийн хамгийн үнэтэй гар утаснуудын нэг болгожээ.

3.Stuart Hughes iPhone 4 Diamond Rose Edition

“Apple” корпорациас дизайнер Стюарт Хьюзтэй хамтарсан энэ бүтээлээ найман сая ам.доллараар үнэлжээ. Хатуу цагаан алтан гадаргуутай, 100 каратын 500 ширхэг алмаазаар бүтсэн юм. Брендийнхээ логог 53 алмааз, голын товчлуурыг 7.4 каратын ягаан алтаар чимэглэсэн уг гар утсыг корпорацийнхаа эзэмшигчдэд зориулан хоёрхон ширхгийг үйлдвэрлэсэн байна.

2.Stuart Hughes iPhone 4s Elite Gold

9.4 сая ам.долларын үнэ бүхий уг гар утсыг мөн л Стюарт Хьюзийн дизайны сонголтоор бүтээсэн аж. 100 каратын 500 ширхэг алмаазаар бүрхэж, 24 каратын алт, 53 ширхэг алмаазаар логог нь урлажээ. Голын товчлуурыг нь 8.6 каратын алмаазаар урласан бөгөөд хэрэглэгч нь түүнийг гээж, алга болгосон тохиолдол 7.6 каратын алмаазаар нөхөн чимэглэж өгдөг байна.

1.Falcon Supernova iPhone 6 Pink Diamond

Жагсаалтын нэгт орсон энэ гар утас 48.5 сая ам.доллараар үнэлэгддэгээрээ бусдаасаа онцгойрно. 24 каратын алт болон маш ховор ягаан алмаазаар чимж, цагаан алтаар бүрхсэн уг гар утас гаднын халдлагаас эзэмшигчээ хамгаалах дэлхий дээрх хамгийн сайн хамгаалалтын төхөөрөмжтэй гэнэ. Дэлхийд цор ганц үйлдвэрлэгдсэн уг гар утсыг Азийн тэргүүн баяны гэргий болох Нита Амбани эзэмшдэг ажээ.