ЛИЦЕНЗИЙН СОНСГОЛЫГ Б.НЯМТАЙШИР, Н.НОМТОЙБАЯР НАРЫГ ХАРЛУУЛАХААР ХИЙСЭН ҮҮ

      Ёстой л нөгөө тоо гүйцээнэ гэдэг шиг сонгуулиас өмнө ямартай ч лицензийн сонсголоо хийгээд амжлаа. Хянан шалгах түр хорооноос зохион байгуулж байгаа нотлох баримтыг шинжлэн судлах нээлттэй сонсгол хоёр өдөр үргэлжлэх юм. Харин сонсголд дуудагдах ёстой байсан 50 гаруй байгууллагаас 12 байгууллага нотлох баримтаа ирүүлээгүй, есөн байгууллага дутуу явуулсан болохыг сонсгол даргалагч Б.Энх-Амгалан хэлсэн. Үүнээс харахад сонгуулиас өмнө амжиж халтуурдсан лицензийн сонсголд нотлох баримтаа ирүүлэх байгууллага, сонсголд очих хүн байгаагүй болов уу гэж хардахаар байлаа. Хэдэн гэрч, шинжээч нарын хүчинд сонсгол үргэлжилж байна. Өчигдрийн сонсголоор "1992 оноос өнөөдрийг хүртэл 14876 ашигт малтмалын тусгай зөвшөөрөл олгогдсон. 

Үүнээс 12019 нь хайгуулын зөвшөөрөл, 2858 нь ашиглалтын зөвшөөрөл байгаа аж. Монгол Улсын нийт нутаг дэвсгэрийн 1.2 га газар нь ашиглалтын тусгай зөвшөөрөлтэй, 5.2 га газар хайгуулын зөвшөөрөлтэй хэмээн шинжээч хэлсэн. Тэднээс хамгийн их зөвшөөрөлтэй нь МАК буюу Б.Нямтайширын гэр бүл болох нь олон нийтэд ил болж, иргэд тэднийг жигшив. Тиймээс энэ удаагийн сонсголыг Б.Нямтайширын гэр бүл, тэр дундаа Н.Номтойбаярыг харлуулахаар хийсэн хэмээн иргэд ярьж байгаа. Бүр цаашилбал, Н.Номтойбаярын "Үндэсний эвсэл"-ийг муухай харагдуулахаар санаархсан гэж болмоор. Тодруулбал, сонсголоор хамгийн их хайгуулын болон ашиглалтын лиценз эзэмшдэг компаниар Монголын алт МАК тэргүүлсэн. МАК дангаараа 26 лиценз эзэмшдэг бол хамаарал бүхий компаниудынхаа зөвшөөрөлтэй нийт 40 лиценз эзэмшдэг баримт нь өчигдөр ил болсон. Өөрөөр хэлбэл, хамгийн их тусгай зөвшөөрөлтэй 25 хүний эхний тавд Б.Нямтайшир гурван хүүхэдтэйгээ багтаж байх жишээний. Нарийвчлан үзвэл, Б.Нямтайшир 41 зөвшөөрөл, Н.Номтойбаяр 40, Н.Цэлмүүн 40, Н.Мөнгөншагай 40 гээд тэдний гэр бүл нийт 161 ашигт малтмалын тусгай зөвшөөрөл эзэмшдэг байна. Тэд төрийн мэдлийн “Эрдэнэс монгол” ХХК-иас их ашиг малтмалын зөвшөөрөлтэй байгаа нь  Монголын төр эзэнгүй болсныг илтгэж байгаа хэмээн иргэд бухимдацгааж байв. Лицензийн сонсголоор Үндэсний ардчилсан намын "Үндэсний эвсэл"-ийн тэргүүн Н.Номтойбаярыг муухай харагдуулах гэж оролдсон байж болох. Учир нь түүнийг МАН-ын томчуудтай таагүй харилцаатай гэдэг. Түүнийг эвслийн нэрээр дахин улс төрд орох гэж байгаад МАН-ынхан нүүр буруулж байгаа гэх.

ЛИЦЕНЗИЙН СОНСГОЛЫГ СОНГУУЛИЙН САЛХИНД ЗАМХРААЛГҮЙ ҮР ДҮНГ НЬ ҮЗЭЖ ЧАДАХ УУ

     Уг нь тэдэнтэй адил лиценкийн сонсголоор баримтаа дэлгүүлэх хүн МАН-д ч, АН-д ч бий. Ялангуяа МАН-д бүр олон хүн бий гэгддэг. Харин тэднийг сонгуулийн салхинд замхраалгүй, сонсголынхоо үр дүнг үзэж, төрийн компаниудаас ч их ашигт малтмалын зөвшөөрөлтэй компаниудын эздэд хариуцлага тооцох нь чухал болоод байна. Зах, замбараагүй уул, уурхай, ашигт малтмалын лиценз эзэмшдэг үеийн үед эрх мэдэл, албан тушаал, мөнгөөр далайдаг байсан улс төр, бизнесийн томчуудад хариуцлага хүлээлгэж чадах уу, Түр хорооныхон. Мөн л сонгуулиас өмнө амжуулахын тул Эмийн сонсгол, Ногоон автобусны сонсгол, Нүүрсний сонсгол шиг нэр төдий эхлүүлсэн болоод л хаях уу.