Кино үйлдвэрлэдэг боллоо, зарим уран бүтээлчид. Хэдий хэр хугацаанд аль зуурт нь амжаад бүтээчив гэмээр дорхноо л хийчихсэн байх. Тийм бүтээлд нь утга, агуулга, дүр, хийц хэлбэр гэж үнэндээ л байхгүй дээ. Тэгсэн атлаа санаа зовох ч үгүй кино сангууддаа үнэлээд тавьчихна. Кино гэхээрээ л хэн нэгэн архинд орж, хүчирлүүлж, эсвэл хүн алж, шоронгийн том хоригдол болж, гэр бүлээ хууралт байдаг шиг л нэг санаагаа байнга давтана. Цаашлаад тэр үг сонголт, дүрүүдийн хоорондын харилцаа хандлагын тухай нь ч яриад ч хэрэггүй дээ. Авах, тусгах юм гэж нэгээхэн нь ч байхгүй. Уг нь уурлаж байсан ч жинтэй үгтэй, учирлаж байхдаа ч ой тоо, зүрх сэтгэлдээ хадгалчихмаар үгстэй дүрүүд манай алтан үеийн кинонуудад байдаг даа. Одоо бол битүү хараал, дүүрэн сөрөг үйл явдал.

      Ганцхан жишээ л гэхэд сүүлд шинээр гарсан “Амьдралд хайртай” киноны гол дүрд жүжигчин Г.Золзаяа тоглосон. Үзэгчид мэднэ дээ, авьяастай, онцлог дүрүүдтэй сайхан жүжигчин. Ихэнхдээ дурлалт эмэгтэйн дүрээр уулздаг түүнтэй энэ бүтээлд архи уудаг эмэгтэйн дүрээр уулзсан. Мэдээж тийм дүр байж болно. Даанч архинд орсох шалтгаан нь дэндүү дулимагхан. Үр нь эндсэн хүн хэцүү л дээ. Гэхдээ энэ зовлонг хэд хэдээр нь үзэө, бүр өсөж том болсон үрээ алдсан улс ч байдаг. Үгүй ядаж гол дүрийн Саран жирэмсэн болох бүрдээ эндчихээд байсан бол ээж болох хувьгүйн байна гээд сэтгэлээр унаж архинд орлоо гэхэд болох сон. Гэтэл залуу хүн мөртлөө анхны үрээ эндэхэд л шууд архинд орж, түүнээсээ гарч чадахгүй байгаа нь сэтгэлийн тэнхээгүй, эрхэлж өссөн дураараа нэгэн эмэгтэйг л харуулахаас хэтэрсэнгүй. Ийм нэг киноны дүрд тоглосон жүжигчин л үнэндээ хайран юм. Уран сайхны кино гэж өөрсдөө тодотгоод буй киноноос нь нэг л гэхэд энэ.     

      Мөн сошиал дээр хэсгээс нь оруулчихаад, үргэлжлүүлэн үзэх бол +1, ийм аппликейшн татаж, тэдийг төлж үзээрэй гэж байгаа кино нэртнүүд бол ичих булчирхайгаа бүр гээсэн. Хадам ээж, хүргэн, хүргэн ах, бэр эгч, замд гээгдсэн охин гэхчлэн утга агуулга, хэлэх санаа гэж даанч байхгүй. Тэгснээ нэг, хоёр цуврал болгон оруулчихна гээч. Ийм сэтгэхүй дорой, амархан аргаар мөнгө олж л байвал юу ч хийхэд бэлэн болчихсон улс ч одоо болих хэрэгтэй. Кино бол сайн зохиолтой, түүнийгээ баяжуулсан хийц, дүрүүдийн өндөр чадвараар бүтсэн, үзээд нэгийг бодох, хоёрыг ойлгох бүтээл. Гэтэл үнэндээ амархан аргаар хийдэг утгагүй кино дүүрэн үйлдвэрлэгдэж байна. Тэгж байтал нэмээд улсынхаа хамаг болохгүй бүтэхгүйг кинондоо шингээчихнэ. Мэдээж байж болох ч өөр өчнөөн сэдэв санаа, зохиол бүтээл бий шүү дээ.