Монгол хүний үндэсний бахархал, эв нэгдлийг бэхжүүлэх, монгол хэл, бичиг, түүх, соёл, нүүдлийн соёл иргэншлийн үнэт зүйлсийг хадгалан хамгаалж, хойч үедээ өвлүүлэн уламжлах нь үндэсний оюун санааны дархлааг бэхжүүлэхэд чухал ач холбогдолтой юм. Монголын өв соёл, уламжлал, үнэт зүйлсээ эрхэмлэн дээдэлж, үндэсний онцлогоо орчин үеийн бүтээлч сэтгэлгээтэй хослуулан түгээн дэлгэрүүлэх нь аяны гол зорилго юм. 

Энэ онд 1206 оны Их хуралдайгаар Тэмүжинг Чингис хаан хэмээн өргөмжилж, Их Монгол Улсыг байгуулсан түүхэн үйл явдлын 820 жилийн ой тохиож байна. Иймд энэ жил үндэсний түүх, соёл, төрт ёсны уламжлал, бахархалт өвөө түгээн дэлгэрүүлэхэд ач холбогдолтой цаг тохиож байгаа юм. 

Соёл, спорт, аялал жуулчлал, залуучуудын яам эдгээр түүхэн өдрүүдийн ач холбогдол, бахархалт хүмүүсийн бүтээл туурвил, бүтээлч сэтгэлгээг иргэд, хүүхэд залуучуудад таниулах зорилгоор 11 дүгээр сарыг аяны сар болгон тэмдэглэж байна. Аяныг улс, бүс, орон нутаг, байгууллагын түвшинд зохион байгуулах ажлыг Засгийн газрын хэрэгжүүлэгч агентлаг Соёл, урлагийн газарт даалгажээ. Мөн аяныг хэрэгжүүлэх чиглэлийг төрийн болон орон нутгийн өмчийн соёл урлагийн байгууллагуудад хүргүүлсэн байна.

Аяны хүрээнд улсын хэмжээнд дараах чиглэлээр үйл ажиллагаа зохион байгуулна:

• Соёл, уламжлал, түүхээ хүндэтгэх сэтгэлгээг төлөвшүүлэх;
• Үндэсний хэл, бичгийн хэрэглээг нэмэгдүүлж, үнэ цэнийг нь таниулах;
• Төр, нийгмийн зүтгэлтнүүдийн бүтээл туурвил, үзэл санааг түгээн дэлгэрүүлэх;
• Монгол Улсын Үндсэн хуулийн үзэл санааг сурталчилж, тусгаар тогтнолын үнэ цэн, эрх зүйн соёлын ухамсрыг бэхжүүлэх.

Энэ жилийн аяны хүрээнд Монголын орчин үеийн утга зохиолыг үндэслэгч, нэрт яруу найрагч Дашдоржийн Нацагдоржийн мэндэлсний 120 жилийн ойг тохиолдуулан түүний уран бүтээлийг онцлон сурталчилж байна. Соён гэгээрүүлэгч Д.Нацагдорж эх орон, байгаль дэлхий, хүн ард, эрх чөлөө, үндэсний өв соёлын үнэ цэнийг уран бүтээлдээ илэрхийлж, үндэсний ухамсар, эх оронч үзлийг төлөвшүүлэхэд үнэтэй хувь нэмэр оруулсан юм.

Соёл, боловсрол, нийгмийн чиглэлээр үйл ажиллагаа явуулдаг мэргэжлийн холбоод, олон нийтийн байгууллагууд, чөлөөт уран бүтээлчид, эрдэмтэн судлаачдыг үйл ажиллагаагаа аянтай уялдуулан ажиллахыг уриалжээ. 

Б.Наранцолмон