ЭРГЭЛТ.МН  мэдээллийн сайт ням гариг бүрд сэтгүүлчдийнхээ тухайн долоо хоногт бичсэн нийтлэл, ярилцлага, эрэн сурвалжилсан сурвалжилга, нэвтрүүлгээс нэгийг онцлон танилцуулдаг билээ. Энэ удаа бид Шуурхай мэдээллийн албаны дарга Ц.Цогтбаярын бичсэн "МАН-д "урвасан" АН-ын дарга асан" нийтлэлийг онцолж байна.

            УИХ-ын өнгөрсөн сонгуулиар МАН үнэмлэхүй ялалт байгуулж, АН бүлэг байгуулах төдий санал авч, хоёр удаагийн сонгууль дараалан ялагдал хүлээж, амаараа шороо үмхсэн. Үүний хариуцлагыг АН-ын дарга С.Эрдэнэ хүлээж, сүр дуулиантай хэвлэлийн хурал зарлан, ард түмэн хийгээд намынхаа дэмжигч, гишүүдээс уучлал хүсэж “АН амжилт үзүүлж чадсангүй. Намаа ялагдуулсан хариуцлагаа хүлээж, үндсэн дүрмийн дагуу намын даргын албан тушаалаа өгч байгаагаа зарлаж байна. Намын шинэ дарга томилогдох хүртэл даргын үүрэг гүйцэтгэх түр эрх, тамга тэмдгийг дэд дарга Ц.Туваанд шилжүүлж байна. Намын шинэ даргын сунгаа, Үндэсний бодлогын хорооны хурал, намын X их хурлыг амжилттай зохион байгуулна гэдэгт нь итгэж байна. Намын 200 мянган гишүүн, дэмжигчдээсээ уучлал хүсэж байна" хэмээн толгой бөхийж байсан. Улмаар долдугаар сарын 8-нд АН-ын даргын тамга, тэмдгийг УИХ-ын гишүүн, АН-ын дэд дарга Ц.Туваанд шилжүүлсэн билээ.  

            Гэтэл гэнэт С.Эрдэнэ дарга хэлсэн, ярьснаасаа буцаж эхэлсэн юм. Тэрбээр өнгөрсөн арванхоёрдугаар сарын 18, 19-нд цахимаар болсон намын X их хурлыг хүчингүй хэмээж, "Ц.Тувааныг намын их хурлыг хуралдуулах эрх бүхий субьект биш. Би одоо ч АН-ын дарга хэвээрээ" гэдгийг хэдэнтээ хэвлэлээр зарласан. Бүр тодорхой сийрүүлбэл “Би АН-ын хууль ёсны даргын хувьд Ц.Тувааны түр эрхийг цуцалсан. Түүнд намын даргын үүрэг гүйцэтгэх эрх байгаагүй. Удаа дараа шаардлага тавиад байхад тэр намын даргын тамгыг өгөхгүй байгаа учраас УБЕГ-аас зөвшөөрөл олгосны дагуу би тамга тэмдгээ шинээр хийлгэсэн. Одоо Ардчилсан намыг жинхэнэ сөрөг хүчний хувиар ажиллуулна” хэмээн мэдэгдсэн.

            Энэ тухай манай сэтгүүлч Б.Цогтбаяр "Эндээс харвал С.Эрдэнийн “Хариуцлага хүлээлт” зургаахан сарын настай байжээ. Өөрөөр хэлбэл, зургаан сарын өмнө “Намаа ялагдуулсан хариуцлагаа хүлээж намын даргын ажлаа өгч байна” гэж мэдэгдэхдээ даргын суудлаасаа жинхнээсээ буугаагүй байж. Харин ажлаа өгч байна гэж ард түмнийг хуурч, хариуцлага хүлээж байгаа мэтээр жүжиглэсэн байх нь. Бүтэн зургаан сарын турш Ц.Туваанд "хуурамч" эрх эдлүүлж, хариуцлага хүлээж ажлаа өгсөн мэтээр ард түмнийг хуурч, гишүүд дэмжигчдээ эцэггүй хүүхэд шиг бүлтэлзүүлэх ямар шаардлага байв аа" хэмээн бичсэн юм.

            Мөн түүний энэ хариуцлагагүй мэдэгдэл, үйлдлийн цаана нуугдаж байгаа үнэнг  "Цаад шалтгаан нь тэр МАН-тай улс төрийн тохироо хийсэн бололтой. Энэ тохироо нь түүний хууль, хяналтын байгууллагад шалгагдаж байгаа Нийгмийн даатгалын сангийн 180 тэрбумыг үрэн таран хийсэн, 12 тэрбумын эвдэрхий элеватор шахсан, нас барсан хүмүүсийн нэр дээр тэтгэвэр авч улсад зургаан тэрбумын хохирол учруулсан тэргүүтэй хэргүүдийг нь цайруулах тухай ч байж мэднэ гэх. Гэхдээ энэ тохироо үнэн байгаад, ногоон гэрлээр шийдэгдвэл дээрх хэргүүдэд нэр нь хавчуулагддаг Н.Номтойбаяр С.Эрдэнийг ингээд орхихгүй нь, тэр тусмаа МАН-тай хийсэн тохироог илчлэх нь цаг хугацааны л асуудал юм" гэж сэтгүүлчийн өнцгөөс энэ асуудлыг хөндөн бичжээ.

            Энэ талаарх дэлгэрэнгүй нийтлэлийг https://ergelt.mn/news/175/single/3962 холбоосоор уншина уу.