-СОНГИНОХАЙРХАН ДҮҮРЭГТ 2.6 ТЭРБУМ ТӨГРӨГӨӨР ЖИШИГ ГУДАМЖ БАРИНА-

 Нийслэлийн Засаг дарга бөгөөд Улаабаатар хотын захирагч Д.Сумъяабазар арваннэгдүгээр сарын24-нд нийслэлийн ирэх оны төсвийн төслийг НИТХ-ын дарга Ж.Батбаясгаланд өргөн мэдүүлсэн билээ. Монгол Улсын Ерөнхийлөгч Х.Баттулга ирэх оны улсын төсөвт бүхэлд нь хориг тавиад байгаа учраас нийслэлийн төсвийн хэлэлцүүлэг мөн хойшлоод байгаа юм. 

Нийслэлийн орон нутгийн төсвийн суурь орлогыг 974.0 тэрбум төгрөг, суурь зарлагыг 325.4 тэрбум төгрөг, орон нутгийн төсвийн тэнцлийн ашгийн 30 хувь болох 420.8 тэрбум төгрөгийг улсын төсөвт татан төвлөрүүлэхээр тооцжээ.   Улаанбаатар хот 2021 онд нэг их наяд 107 тэрбум 656 сая төгрөгийн орлого төвлөрүүлэхээр төлөвлөсний 91.4 хувь буюу нэг их наяд 12.8 тэрбум төгрөгийг татварын орлогоор, үлдэх 8.6 хувийг татварын бус орлогоор бүрдүүлэхээр төлөвлөжээ. Тэгвэл хотын шинэ дарга ирэх онд нийслэлд ямар бүтээн байгуулалт, хөрөнгө оруулалт хийхээр тусгасан талаар танилцуулж байна. 

Сонгинохайрхан дүүргийн нутгийн захиргааны байранд ирэх жил 716 сая төгрөг төсөвлөсөн байна. Уг барилга нь 6.8 тэрбум төгрөгийн өртөгтэй. Тус дүүрэгт баригдаж байгаа Авто худалдааны цогцолборын дэд бүтцийн ажилд 500 сая төгрөг тусгажээ. Түүнчлэн Сонгинохайрхан дүүрэгт 2.6 орчим тэрбум төгрөгийн өртөгтэй жишиг гудамжийг 2020-2022 онд барьж гүйцэтгүүлэхээр тусгаснаас ирэх онд 500 сая төгрөгийг нь төсөвт  оруулсан байна. Мөн Налайх дүүрэгт 610 сая төгрөгийн өртөгтэй сагсан бөмбөгийн талбайн тохижилтод 373 сая төгрөг төсөвлөжээ. 

Мөн Шувуун Фабрик-Сонгино чиглэлийн авто замын Туул гол дээрх 256 метрийн урттай төмөрбетонгүүрийн их засварын ажилд ирэх онд хоёр тэрбум төгрөг төсөвлөсөн бол Сүхбаатар дүүргийн XV, XVI хороонд хийгдэх авто зам гүүрийн ажилд 1.5 тэрбум төгрөг суулгажээ. Түүнчлэн Сонгинохайрхан дүүргийн XXVIII хороо Баянхошууны авто замаас зүүн тийш 264 дүгээр цэцэрлэгийн урдуур Баянхошууны эцсийн буудал хүртэлх туслах замтай холбох хатуу хучилттай авто замын ажилд 2.1 орчим тэрбум төгрөг, тус дүүргийн XI хороо Хувьсгалчдын гудамжнаас Хонхорын 6-177 б хүртэлх хатуу хучилттай авто замын ажилд нэг тэрбум гаруй төгрөгийн санхүүжилт тавьжээ. Мөн Эрчим хүчний гудамжны зургаан км автозамын шинэчлэлийн ажилд гурван тэрбум төгрөг, Баянхошууны эцсийн буудлаас хойш үргэлжлэх гурван км авто зам, гүүрийн эхний ээлжийн ажилд нэг тэрбум төгрөг тусгасан байна. 

-“ТОЛГОЙТ” ХӨГЖЛИЙН ТӨВИЙН БАРИЛГАД НЭГ ТЭРБУМ 118 САЯ ТӨГРӨГ ТӨСӨВЛӨЖЭЭ-

Ирэх онд Улаанбаатар хотод хийгдэх томоохон хэмжээний тохижилтын ажлаас дурдвал, Баянзүрх дүүргийн Үндэсний цэцэрлэгт хүрээлэнгийн баруун хэсгийн тохижилтод 168 сая төгрөг тусгасан байна. Харин хотын дарга асан С.Амарсайханы үед барьсан гурван тэрбум 788.4 сая төгрөгийн өртөгтэй усан оргилуур, цэцэрлэгт хүрээлэнгийн тохижилт ногоон байгууламжийн ажилд 500 сая төгрөг зарцуулахаар болжээ. Мөн “Блю скай” зочид буудлын зүүн талын гадна талбайн тохижилтын ажилд 419.8 сая төгрөг төсөвлөсөн байна. Уг талбай нь энэ намар ашиглалтад орсон юм. Харин Сонгинохайрхан дүүргийн “Толгойт” хөгжлийн төвийн барилгад нэг тэрбум 118 сая төгрөг тусгахаар төлөвлөжээ.  

-ИРЭХ ЖИЛ НИЙТИЙН ТЭЭВРИЙН САЛБАРТ ШИНЭЧЛЭЛ ХИЙГДЭХГҮЙ НЬ-

Нийслэлийн төвийн зургаан дүүрэгт ирэх жил унадаг дугуйн замын багц ажилд нийтдээ гурван тэрбум гаруй төгрөг төсөвт суулгасан байна. Мөн анхаарал татаж буй нэг зүйл нь зөвлөх үйлчилгээ, хяналтын зардалд 685 сая төгрөг, магадлашгүй ажилд 683.8 сая төгрөг, Улаанбаатар хотыг 2040 он хүртэл хөгжүүлэх ерөнхий төлөвлөгөө боловсруулах ажилд 368.5 сая, 2019 онд эхэлсэн Агаар орчны бохирдлыг бууруулах гэр хорооллын “хөгжлийн үүд” төсөлд 3.8 тэрбум, “Улаанбаатар такси сервес” төсөл хэрэгжүүлэхэд 700 сая, Төв цэвэрлэх байгууламжийн өргөтгөл, шинэчлэлтийн ажлын зөвлөх үйлчилгээнд 442.9 сая төгрөг тус тус төсөвлөжээ. 

-2019-2021 “Утаагүй Улаанбаатар” хөтөлбөрийн хүрээнд агаарын бохирдлыг бууруулах төсөл арга хэмжээнд 300 сая төгрөг, 

-2018-2021 “Утаагүй Улаанбаатар” хөтөлбөрийн хүрээнд агаарын бохирдлыг бууруулах төсөл арга хэмжээг хэрэгжүүлэхд 108 сая төгрөг, 

-2017-2021 “Утаагүй Улаанбаатар” хөтөлбөрийн хүрээнд агаарын бохирдлыг бууруулах төсөл арга хэмжээг хэрэгжүүлэхэд 491 сая төгрөг тус тус суулгасан байна. 

Нийслэлийн ирэх оны төсвийн төслийг харахад дэд бүтцийн салбар болон автозамын салбарт түлхүү хөрөнгө оруулалт хийхээр харагдаж байна. Харин нийгмийн салбар болон төрийн үйлчилгээг сайжруулах салбарын хөрөнгө оруулалт бага байна. Хамгийн бага буюу хоёр хувийн хөрөнгө оруулалт хийгдэх салбар нь нийтийн тээвэр байна. Тус салбарыг орхигдуулснаас харахад ирэх жилүүдэд нийтийн тээврээс шинэчлэлт хүлээгээд хэрэггүй бололтой. 

 Хотын дарга асан С.Амарсайханы 3.7 тэрбум төгрөгөөр барьсан усан оргилуурыг ирэх жил 500 сая төгрөгөөр тохижуулна