Алтан Бүүкэрийн эзэн Майкл Ондатжегийн “Англи өвчтөн” ном уншигч түмнээ хүрэхэд бэлэн болжээ. 1992 онд хэвлэгдсэн даруйдаа тус роман судлаач, шүүмжлэгч нарын анхаарлыг татан, сайшаал магтаал дагуулснаар Бүүкэрийн шагнал хүртсэн бөгөөд 2018 онд шилдгийн шилдэг гэгдэх Алтан Бүүкэрийн эзнээр тодорсон юм. 50,000 фунт стерлинг бүхий шагналыг хоёр ч удаа авсан эл бүтээлийн онцлог юу вэ.

Зохиолын үйл явдал Дэлхийн II-р дайны үед Италийн Флоренцийн ойролцоох бөмбөгдүүлэн, эзгүйрсэн харш Сан Жироламод өрнөнө. Гол дүрийн тухайд аялгаас нь үүдэн “Англи хүн” гэгдээд буй хүндээр шархадан түлэгдсэн эр, түүнийг асрах канад гаралтай сувилагч Хана, англи эрийн жинхэнэ дүрийг мэдэх хулгайч эр Караважо болон тэсрэх бөмбөг салгах мэргэжилтэй энэтхэг залуу Кип дөрвийн тухай өгүүлнэ. Англи эр өөрийгөө хэн болох, ямар түүхтэй нэгэн гэдгээ одоо цаг болон өмнөх үеэ дурссаар зохиолын туршид уншигч та түүнтэй хамт үнэний эрэлд гарна.

Дайны голомтоос ирсэн, өөр өөрийн гэсэн амьдралтай, үзэл бодолтой, дөрвөн өөр нутгийн “хувь” хүмүүс нэг харшид. Дайн, цөл, хайр дурлал, хувь хүний үзэл бодол дунд огтлолцох ч зүйл бий, огт таарахгүй  зүйлс ч бий. Чухам юу тэднийг нэгтгэн, нэг харшид амьдрах болсон хийгээд юу тэднийг нэг нэгнээсээ ялгаруулж байгааг уншигч олон л олж мэдэх буй заа.

Уг зохиолоор дөрвөн жилийн дараа кино хийсэн бөгөөд 69 дэх Оскарын шагналын арван хоёр төрөлд нэр дэвшин, есөд нь ялалт байгуулсан зэргээр ихээхэн амжилт олсон юм. Кино, зохиолын аль аль нь ихэд амжилт олсон тул олон түмэн харьцуулан үзэх нь тодорхой. Кино “англи” эрийн дурлалт бүсгүй Кэтринд төвлөрөх бол зохиол сувилагч бүсгүйд төвлөрч байгаа гэх мэтчилэн ялгаатай зүйлс цөөнгүй. Дөнгөж орчуулагдан уншигч бидний сонорт хүрч буй шинэхэн ном, дээр дурьдсан кино хийгээд зохиолын ялгаатай байдал, хооронд нь харьцуулалт хийх боломжийг олгож байна.