Төв аймгийн Борнуур суманд гурван хүн нас барсан хэрэг гарчээ. Энэ талаар бид дараах мэдээллийг бэлтгэлээ.

     Борнуур сумын ерөнхий боловсролын сургуулийн дотуур байранд амьдардаг аравдугаар ангийн хоёр охин зам тээврийн ослоор амиа алджээ. Энэ тухай дуудлага цагдаагийн байгууллагад аравдугаар сарын 20-ны 00:51 цагт иржээ. Ингэхдээ “Борнуур сумын Пүүний дэнж гэх газарт тээврийн хэрэгсэл осолдож, хоёр хүн нас барлаа” гэж мэдэгдсэн байна. Цагдаагийн албан хаагчид дуудлагын дагуу ажиллахад “Тоёото приус-40” маркийн автомашин зам тээврийн осол гаргаж, 16 настай Б, 16 настай Э нар амиа алдсан байжээ. Мөн тээврийн хэрэгслийг жолоодож явсан 19 настай Э гэх эмэгтэй хүнд бэртсэн байна.

      Хамгийн ноцтой нь, уг дуудлагаас ердөө цагийн дараа Борнуур сумаас дахин дуудлага иржээ. Тодруулбал, аравдугаар сарын 20-ны 01:50 цагт “Хүн боомилж нас барсан байна” гэх дуудлага бүртгэгдсэн байна. Дуудлагын дагуу шалгалтын ажиллагаа явуулахад 27 настай, эрэгтэй Л гэгч нь гэрийнхээ тоононоос боомилж, нас барсан байдалтай олджээ.

ТАЛИЙГААЧ Л ГЭГЧ НЬ ХҮЧИНГИЙН ХЭРГЭЭР ШАЛГАГДАЖ БАЙСАН БӨГӨӨД АМИА АЛДСАН СУРАГЧ ОХИДТОЙ ХАМТ ЗОРЧИЖ ЯВЖЭЭ

      Талийгаач Л нь Борнуур сумын ерөнхий боловсролын сургуульд газарзүйн багшаар ажиллаж байжээ. Тэрээр өнгөрсөн хавар буюу тавдугаар сард 12 настай охиныг хүчирхийлсэн хэргээр цагдаагийн байгууллагад шалгагдаж байсан аж. Дээрх хэрэг гарахаас өмнө нь шалгалтын ажиллагаа нь үргэлжилж, түүнийг гадуур байцааж байсан гэнэ. Сургуулийн зүгээс шүүхийн шийдвэр гараагүй, гэм буруутай эсэх нь тогтоогдоогүй учир Л-ыг аравдугаар сар хүртэл ажлаас нь чөлөөлөөгүй байжээ. Ингээд хэдхэн хоногийн өмнө ажлаас нь чөлөөлөх шийдвэр гарсан аж.

Эх сурвалжийн бидэнд өгч буй мэдээллээр “Талийгаач Борнуур сумын сургуульд багшлаад хоёр жил болж байсан. 2022 онд их сургуулиа төгссөн. Газар зүйн багш Б.Лхам өнгөрсөн жил улсын хэмжээний шилдэг 40 багшаас дөрөвдүгээрт эрэмбэлэгдэж байсан юм. Чадварлаг, ажилдаа сайн учраас сургуулийн захирал ажлаас нь чөлөөлөхгүй байсан байх. Тэгээд сум даяараа энэ хэргийг ярьж байхад ч тоохгүй байсан. Энэ хэргээсээ болоод Лхам багш есдүгээр сард ажилдаа бараг л ирээгүй. Хичээл нь цонхлоод, хүүхдүүд хохироод байсан учраас арга буюу чөлөөлсөн байх. Гэхдээ багш нарын баяр хүртэл ажлаараа ирж очин байсан. Талийгаач багшийн хүчирхийлсэн гээд байгаа охин хохироод үлдлээ. Ар гэр нь боломж тааруу учраас яаж ч чадсангүй. Шүүх уг нь хорих шийдвэр гаргасан бол тэр хүн амиа хорлохгүй байсан байх. Сургуулийн захиргаа ч тэр, цагдаа, шүүх ч хохирогч охины ээжийг тоогоогүй, мэдээлэл өгч болохгүй гэж хааж байсан” гэв.

Ноцтой нь, талийгаач багш Л нь зам тээврийн ослоор амиа алдсан хоёр охинтой хамт зорчиж явсан гэх мэдээлэл байна. Талийгаач охид тус сумын сургуулийн дотуур байранд амьдардаг байсан. Дотуур байрны оройн тоо 19:00 цагт болоход охид өрөөндөө байжээ. Хяналтын камерын бичлэгээр байрнаасаа гарч, Э, Л нарын машинд суусан гэнэ. Өөрөөр хэлбэл, газарзүйн багш Л нь зам тээврийн осол гарах хүртэл талийгаач охидтой хамт зорчиж явсан бөгөөд ослын дараа гэртээ очиж, амиа егүүтгэсэн байж болзошгүй байна.

ТАЛИЙГААЧ Л БАГШИЙН ЭЭЖ М: БИД ЯМАР Ч МЭДЭЭЛЭЛ ӨГӨХГҮЙ

        Энэ хэргийн талаар тодруулахаар бид талийгаач багш Л-ын ээж М-тэй холбогдоход мэдээлэл өгөхөөс татгалзлаа. Тэрбээр “Одоо бидэнд ярих ямар ч боломж алга. Өмнө, хойно шалгагдаж байсан хэргийг нь мэдэхгүй. Цагдаагийн байгууллага нь шалгаж тогтооно биз” гэв.

Мөн бид Борнуур сумын сургуулийн захиргаа, хүүхэд хамгааллын багийнхантай холбогдсон ч “Хэргийг шалгаж байна. Бид нууцын баталгаанд гарын үсэг зурсан. Мэдээлэл өгч болохгүй” гэсэн тайлбарыг өглөө. Дээрх хэргийг Төв аймгийн Цагдаагийн газарт шалгаж байна.