Хүйтэн мөсөн талбай дээр гарч ирэх бүрдээ хүмүүст аз жаргал, инээмсэглэл бэлэглэдэг нар шиг дулаахан уран гулгагч бий. Шагналын тавцан руу бусад тамирчид эрхэмсэг гэх чинь алхсаар ирж байхад тэр л дэгдэн гүйж, үсэрч, хөгжилтэй хөдөлгөөн хийж хүмүүст аз жаргал түгээнэ. Түүнийг Каори Сакамото гэдэг. Япон Улсын алдарт уран гулгагч, олимпын наадмын мөнгө, хүрэл медальтай тамирчин, ДАШТ-ийн дөрвөн удаагийн аварга билээ. ДАШТ-ний үеэр БНСУ-ын багынхны зургийг дарж байхдаа Каори Сакамото хөгжилтэй царай гарган тамирчдыг инээлгэж, тэдний жаргалтай төрхийн гэрэл зургийн хальсанд үлдээж байгаа бичлэг, зураг олон нийтийн анхаарлыг татаж, Каори Сакамотог угаасаа ийм л гайхалтай хүн, уран гулгагч гэдгийг ярьж байна. Тэгвэл 25 настай алдарт уран гулгагч удахгүй зодог тайлах гэж байгаа талаараа мэдээлсэн билээ

МӨСӨН ТАЛБАЙ ДЭЭР ГЯЛАЛЗАЖ ЭХЭЛСЭН ТАВАН НАСТАЙ ОХИН

      Уран гулгагчид талбай дээр гарч ирэхдээ сандардаг бол тэр нүүр дүүрэн инээмсэглэж, гар далласаар орж ирдэг. Талбайн голд зогсоод ая эхлэх мөчтэй зэрэгцэн төгс үзүүлбэрээ үзүүлж, хүмүүсийн нүдийг хужирлаж эхэлнэ. Каори Сакамото 2000 оны дөрөвдүгээр сарын 9-нд Японы Кобе хотод мэндэлжээ. Эрх, хөдөлгөөнтэй сэргэлэн охиноо ээж нь таван настай байхад нь мөсөн талбайд дагуулан очиж, уран гулгалтаар хичээллүүлжээ. Эхэндээ энгийн нэг спорт, чөлөөт цагаа зөв өнгөрүүлэх газар байсан мөсөн талбай аяндаа хамгийн дуртай газар нь болж, түүний төрөлхийн авьяас илэрснээр тэр мэргэжлийн тамирчин болохоор бэлдэж эхэлсэн байна. Дасгалжуулагч нар нь Каори Сакамотогийн хүчтэй үсрэлт, тогтвортой техник, эрч хүчтэй гүйцэтгэлийг нь үргэлж үнэлдэг байж. Хүүхэд байхаасаа тэр үргэлж инээмсэглэж, алдахаас айдаггүй зангаараа дасгалжуулагч нарынхаа анхаарлыг татдаг байв. Энэ чанар нь хожим түүнийг бусдаас ялгарах хамгийн том давуу тал болжээ.

МЭРГЭЖИЛТНҮҮДИЙГ ГАЙХШИРУУЛСАН ХҮЧ, ХУРД, ТОГТВОРТОЙ БАЙДАЛ  

         2013 оноос уран гулгалтын өсвөрийн тэмцээнүүдэд амжилттай оролцож эхэлсэн түүнийг уран гулгагч сонирхогчид, дасгалжуулагчид ирээдүйд Япон Улсын нэрийг өндөрт өргөх ирээдүйтэй тамирчин хэмээн үнэлж, анхаарч эхэлжээ. Хүчтэй үсрэлтүүд тэр дундаа гуравласан эргэлтийг төгс гүйцэтгэж байгаа чадвар нь Каори Сакамотог улсынхаа шигшээ багт дуудагдах үндсийг тавьсан байна. 2016 оноос эхлэн олон улсын өсвөрийн тэмцээнүүдэд оролцож эхэлсэн нь карьерынх том эргэлт болжээ. ISU Junior Grand Prix тэмцээнд анх удаа оролцож, олон улсын уран гулгалтын ертөнцөд өөрийгөө харуулж эхэлсэн байна. Түүний гулгалтын хэв маяг нь Японы уламжлалт эмэгтэйлэг, зөөлөн стилиэс ялгаатай, илүү хүчтэй, шийдэмгий байсан нь шүүгчид болон үзэгчдийн анхаарлыг татаж байлаа. 2017 онд Өсвөрийн дэлхийн аварга шалгаруулах тэмцээнээс хүрэл медаль хүртсэн бол Японы аварга шалгаруулах тэмцээнүүдэд үргэлж дээгүүр байрт шалгардаг болсон байлаа. Эдгээр амжилтууд нь түүнийг ирээдүйн найдвар хэмээн нэрлэгдэхэд хүргэж, ур чадварт нь аль хэдийн насанд хүрэгчдийн түвшний хүч, хурд, тогтвортой байдал ажиглагдаж эхэлсэн нь мэргэжилтнүүдийг гайхшируулж байв.

ДЭЛХИЙН ТАВЦАНД ГАРЧ ИРСЭН НЬ

           Каори Сакамотогийн нэр жинхэнэ утгаараа дэлхийд танигдсан мөч бол 2022 оны өвлийн олимп байлаа. Тэр олимпоос хүрэл медаль хүртэж, дэлхийн шилдгүүдийн нэг гэдгээ баталсан. Гэхдээ энэ бол зөвхөн эхлэл, үүнээс хойш тэр улам хүчирхэгжиж, илүү тогтвортой болж, хэзээ ч алддаггүй мэт гулгаж эхэлсэн. Дараалан дөрвөн удаа дэлхийн аварга болно гэдэг бол ховор амжилт. Энэ бол зөвхөн авьяас биш сахилга бат, тэсвэр тэвчээр, байнгын хичээл зүтгэлийн үр дүн юм. Тэр мөсөн дээр гарах бүрдээ алдах эрхгүй мэт гулгадаг. Дэлхийн аварга болсон тамирчин бүр дараагийн тэмцээндээ тэр амжилтаа хамгаалах ёстой болдог. Каори Сакамотогийн хувьд ч ялгаагүй, биеийн ачаалал, гэмтэл, сэтгэлзүйн дарамт бүхнийг тэр чимээгүйхэн даван туулсаар ирсэн. Заримдаа түүний гулгалтын ард ядарсан, өвдсөн бие нуугдаж байдаг. Гэвч тэр үзэгчдийн өмнө гарч ирэхдээ хэзээ ч үүнийгээ ил харуулдаггүй, шантардаггүй. Тэр инээмсэглэсээр л бусдад аз жаргал, баяр хөөр түгээсээр л байдаг. Тун ховор гаргасан алдааныхаа дараа ч гэсэн тэр нүүр дүүрэн инээгээд босох чадалтай, сэтгэл зүйтэй тамирчин.

ТҮҮНИЙ Л ӨГДӨГ МЭДРЭМЖ

         Шүүгчид түүнийг техникээр нь үнэлдэг бол үзэгчид түүнийг сайхан сэтгэл, тэдэнд төрүүлдэг нандин мэдрэмжээс нь болж хайрладаг. Түүнийг мөсөн дээр гарч ирэхэд уур амьсгал өөрчлөгддөг. Тэр айдасгүй, өөртөө итгэлтэй, хамгийн гол нь жинхэнэ. Тэр мөсөн дээр зөвхөн медалийн төлөө биш, харин өөрийнхөө, эх орныхоо, уран гулгалтад хайртай хүн бүхний төлөө гулгадаг байх. Тиймээс л түүний инээмсэглэл жинхэнэ байж, хүмүүсийн сэтгэлд үлддэг болов уу. Ялалт байгуулсан ч, алдаа гаргасан ч тэр инээмсэглэсээр байдаг. Каори Сакамотогийн үзүүлбэр дуусахад алга ташилт ихэвчлэн илүү чанга, удаан үргэлжилдэг. Учир нь хүмүүс зөвхөн оноонд нь биш, түүний өгсөн мэдрэмжид нь зориулж баяр хүргэдэг биз ээ.

        Тэр уран гулгалтын дэлхийн аварга шалгаруулах тэмцээний дараа “Замналаа алтан медалиар өндөрлүүлж байгаадаа баяртай байна. Олон жил олон зүйлээ золиосолсон. Олимпын улиралд замналаа өндөрлүүлье гэж төлөвлөсөн байсан ч харамсах зүйл алга. Милан Кортинад түрүүлж чадаагүй минь сэтгэлд хүнд туссан. Тэндээс гэртээ хариад 10 хоног огт бэлтгэл хийлгүй, оюун санаа болон биеэ амраасан. Тэгээд ДАШТ-д оролцоод бүхнийг дуусгахаар шийдсэн юм. Замналаа би алтан медалиар дуусгамаар байлаа. Сайн юм сайнаар л дуусдаг жамтай шүү дээ” гэсэн юм. Тэрбээр 2026 оны өвлийн олимпоос мөнгөн медаль хүртсэн билээ, мэдээж түүний хүсэж байсан амжилт биш байсан байх. Мөнгөн медаль хүртсэний дараа ярилцлага өгөхдөө тэрбээр “Дасгалжуулагч Накан "Чи мөнгөн медаль авсан бол одоо Олимпын алтан медальт тамирчин бэлтгэх ээлж боллоо" гэж хэлсэн. Магадгүй хэзээ нэгэн цагт би дасгалжуулагчийн хувиар олимпын наадамд дахин оролцох байх" гэжээ. Үүнээс гадна зодог тайлсныхаа дараа өөрийн төрөлх хот болох Японы баруун хэсэгт байрлах Кобидоо уран гулгалтын талбай нээх хүсэлтэй байгаагаа нээлттэй илэрхийлсэн. Ингээд харвал тэр хэдий тамирчны хувиар зодог тайлсан ч цоо шинэ туршлага, өнгө төрхтэйгөөр шилдэг дасгалжуулагчийн хувиар эргэн ирж магадгүй юм. Шүтэн бишрэгчид нь ч үүнийг хүсэж байгаа. Тэр өөрийнхөө авч чадаагүй олимпын алтан медалийг бэлтгэсэн шавь нараараа дамжуулан хүртэнэ гэдэгт огтхон ч эргэлзэхгүй байна.