АНУ-ын дуучин, жүжигчин Мари Зендаяа “Сэтгэл хөдлөл” хэмээх цувралаараа “Эмми”-гийн шилдэг жүжигчний шагнал хүртэж, түүний карьер огцом өссөн билээ. Мөн энэ жил нээлтээ хийх “Малколм ба Мари” кинонд гол дүр бүтээсэн нь киноны хорхойтон, шүүмжлэгчдийн дунд өндөр хүлээлт үүсгээд буй бөгөөд энэ жилийн Оскарын шилдэг эмэгтэй жүжигчний гол өрсөлдөгч хэмээн найдвар тавьж буй билээ.

 Нетфликсийн дэмжлэгтэй бүтээж буй энэхүү “Малколм ба Мари” кино нь “Сэтгэл хөдлөл” цувралын найруулагч Сэм Левинсоны шинэхэн бүтээл төдийгүй энэ бүтээлийнхээ талаар Зендаяагийн “GQ” сэтгүүлд ярилцлага өгчээ. Уг ярилцлагад Зендаяа “Би өнгөрсөн жилд зөвхөн эрэгтэй хүнд үйлчилдэг дүртэй олон зохиолын саналаас татгалзаад байна” хэмээн ярьсан байна.

“Би Сэмтэй гэрийн гадаах зам дээр ярилцсан юм. Учир нь, манай гэрийн гадаа сандал байхгүй болохоор л тэр. Сэм надад “Чи өөрийгөө “Дисней”-ийн Кэй Си л гэж бодож байна уу. Байшин дотор юм яриад л... Хэрэв бид энэ киног хийвэл хүмүүс чамайг үгүй ээ, энэ Кэй Си биш байна гэж хэлэх болно” гэж хэлсэн” хэмээн ярьжээ.

Тэд ийн “Малколм ба Мари” киноны санааг ярилцсан бөгөөд “Надад хүлцэнгүй, зөвхөн гоё чимэглэл төдийхөн үзүүлдэг найз охины дүрээс илүүг санал болгосон” хэмээжээ. Түүнд өнгөрсөн жил хэвшмэл, зөвхөн эрэгтэй дүрд л үйлчилдэг зохиолын санал ихээр ирсэн ч бүгдэнгээс нь татгалзжээ.

“Миний хүлээн авсан кино зохиолууд сайн, эсвэл муудаа гол нь биш. Би тэр олон зохиолын эмэгтэй дүрүүдэд нэг л янзаар тоглож болох мэт санагдсан. Энэ нь хамаагүй л дээ. Учир нь, хамгийн энгийнээр тайлбарлавал, тэдгээр дүрүүд эрэгтэй дүрийг зорилгодоо хүрэхэд нь л туслах үүрэгтэй. Тэдэнд өөр гарц байхгүй. Дүрүүд нь олон биш, ганц л давхар зөрчилтэй, яг л нэг хүн шиг л дүрүүд байсан юм. Эдгээр кинонд тоглох тийм муу биш ч би хөгжихгүй байсан” хэмээн ярьжээ.

Жүжигчин Зендаяа “Малколм ба Мари” киноны ихээхэн зөрчилтэй дүрд тоглосон нь түүний карьерийг улам бүр өсгөсөөр байгаа аж.