Дэлгэцийн урлагийн нэр хүндтэй шагнал болох Америкийн Кино академийн шагнал бол уран бүтээлчдийн мөрөөдөл гэхэд хилсдэхгүй. Зарим уран бүтээлч энэ шагналд хүрэх урт зам туулдаг бол зарим нь анхны гараагаараа хүртсэн нь ч бий. Туслах дүр бүтээж, дэлгэцийн урлагт анх хөл тавихдаа  “Оскар”-ын шагнал хүртсэн найман жүжигчин байдгийг онцолж байна. 
 

Женнифер Хадсон 

2006 онд дэлгэцэнд гарсан “Dreamgirls” бол 80 сая ам.доллараар бүтсэн, Эдди Мерфи, Жейми Фокс,  Бейонсе зэрэг супер оддын тоглосон кино. Энэ кинонд  бүтээсэн дүрээрээ залуу жүжигчин Женнифер Хадсон “Оскар”, “Алтан бөмбөрцөг”  хүртсэн. Тэрбээр анх 2004 онд “American Idol” шоунд оролцож америкчуудад танигдсан ч дэлгэцэнд бүтээсэн анхны дүр нь Эффи Уайт болсон юм. 
 

Анна Пэкуин 

Анна Пэкуин 11 настайдаа таван мянган охиныг ардаа орхин сонгон шалгаруулалтад тэнцэж, “Төгөлдөр хуур” кинонд тоглосон гэдэг. Жүжиглэх туршлагагүй охин орон нутгийн сонинд нийтэлсэн зарлалын дагуу эгчтэйгээ хамт сонгон шалгаруулалтад очоод  Флора Макгратын дүрд  шалгарсан гэж ярьсан нь бий. Гэсэн ч буйд хотын “туршлагагүй” охин олон улсад алдаршсан кинонд тоглоод зогсохгүй, “Оскар”-ын шагналыг “туслах эмэгтэй дүр” гэсэн номинациар хүртсэн. 
 

Хенг Сомнанг Нгор 

“Оскар”-ын шагнал хүртсэн мэргэжлийн жүжигчин бус хоёр хүний нэг нь америк-камбож эмч Хенг Сомнанг Нгор юм. Улаан кхмерүүдийн дэглэмийн үед Пол Потын хорих лагерьт эхнэр, нялх хүүхдээ алдсан Нгор эхлээд Таиланд руу зугтаж, улмаар АНУ-д ирсэн.  1984 онд тэрбээр “Үхлийн талбар” кинонд камбож сэтгүүлчийн дүрийг бүтээж, “Оскар”, “Алтан бөмбөрцөг”-ийн шагналыг шилдэг туслах эрэгтэй дүрийн төрөлд хүртсэн билээ. 
 

Лупита Нионго 

Лупита Нионго Йелийн их сургуулийг төгссөнийхөө дараа жүжигт тоглож, киноны зураг авалтад ажиллаж байжээ. Тэрбээр “12 жилийн боолчлол” кинонд бүтээсэн дүрээрээ “Оскар” авч, 2015 онд “People” сэтгүүл түүнийг дэлхийн хамгийн сайхан эмэгтэйгээр нэрлэсэн юм. 
 

Гарольд Рассел

Дэлхийн II дайны ахмад дайчин, сургалтын талбайд бөмбөгөнд өртөж хоёр гараа алдсан Гарольд Расселийг найруулагч Уильям Уайлер санамсаргүй олж харсан гэдэг. Гарольд тэр үед Бостоны их сургуульд суралцаж байсан гэдэг. Гарольдийг “Түрүүчийн тэмдэглэл” нэртэй баримтат кинонд оролцож байхад нь найруулагч санал тавьжээ. Дайнд оролцож, тахир дутуу болсон далайчин Гомер Пэрришийн дүр түүнд “Оскар”-ын шагнал авчирсан юм. 
 

Марли Мэтлин

Анхны дүрээрээ Кино академийн шагнал хүртсэн бас нэг жүжигчин бол Марли Мэтлин. Найруулагч Ренда Хейнсийн “Бага бурхны хүүхдүүд” кинонд бүтээсэн дүрээрээ тэрбээр энэ шагналыг хүртсэн хамгийн залуу жүжигчдийн нэг. Марли Мэтлин мөн энэ шагналыг хүртсэн анхны бөгөөд одоогийн байдлаар сүүлчийн сонсголгүй жүжигчин юм. 
 

Барбра Стрейсанд

Нэрт дуучин, жүжигчин Барбра Стрейсанд “Инээдтэй охин” мюзикл кинонд дуучин Фанни Брайсын дүрийг бүтээж, “Оскар”-ын шагнал хүртсэн.19 настай дуучин тэр үед Бродвейн тайзны залуу жүжигчин байсан агаад кино гарсны дараа шоу бизнесийн нэгэн тод од болж гялзалзсан юм. Түүнээс хойш Барбрагийн тоглосон бараг бүх кино  АНУ-ын хамгийн ашиг орлоготой бүтээлүүдийн жагсаалтыг тэргүүлэх болсон. 
 

Жули Эндрюс 

“Мэри Поппинс” кинонд бүтээсэн дүрээр “Оскар”-ын шагнал хүртсэн жүжигчин Жули Эндрюс өмнө нь театрын жүжигчин байсан. Дэлгэцэнд бүтээсэн анхныхаа дүрээр  олны талархлыг хүртсэн Жули Эндрюс өнөөг хүртэл кинонд тоглосоор байгаа бөгөөд “Алтан бөмбөрцөг”, BAFTA, Венецийн кино наадмын “Алтан арслан” тэргүүтэй нэр хүндтэй шагналын эзэн болжээ.