АНУ-ын Ерөнхийлөгчийн сонгуульд нэр дэвшигч Дональд Трамп, Жо Байден нарын мэтгэлцээний хоёрдугаар шат Теннесси мужийн Нэшвилл хотод болж өнгөрлөө. Энэ нь тэдний сүүлчийн мэтгэлцээн бөгөөд нэгдүгээр шатны мэтгэлцээний дараа Ерөнхийлөгч Д.Трамп коронавирусийн халдвар авсан тул хоёр нэр дэвшигч уншигчидтай теле уулзалт хийсэн билээ. 

Өрсөлдөгчийнхөө үгийг таслах боломжгүй 

Энэ удаагийн мэтгэлцээн илүү “боловсон” болж өнгөрлөө. Өнгөрсөн удаагийн мэтгэлцээний турш Д.Трамп өрсөлдөгч Жо Байдены үгийг 71 удаа тасалж байв. Тиймээс энэ удаад нэр дэвшигч бүрт хоёр минутын хугацаа өгч ярих зүйлээ дуусгах боломж олгохоор мэтгэлцээний дүрмийг өөрчилсөн юм. 

Гол сэдэв: коронавирус

Энэ удаагийн мэтгэлцээний сэдвийг урьчилан бэлдсэн агаад коронавирусийн халдвар, америкчуудийн амьдралд үзүүлж буй нөлөө, арьс өнгөөр ялгаварлах асуудал, уур амьсгалын өөрчлөлт, үндэсний аюулгүй байдал, манлайлал гэсэн сэдвүүдээр нэр дэвшигчид үзэл бодлоо илэрхийлсэн. Трамп цар тахалтай тэмцэж буйгаа, вакцин удахгүй гарна гэдгийг онцолж байсан бол Байден өвчлөгчдийн тоо нэмэгдсээр байгааг сануулж байлаа. 

Москвагаас дэмжлэг аваагүй 

Энэ удаагийн Ерөнхийлөгчийн сонгуулийн кампанийг нэр дэвшигчид Оросоос дэмжлэг авсан гэх маргаан дагасаар буй. Сүүлчийн мэтгэлцээний үеэр хоёр нэр дэвшигч Москвагаас ямар ч дэмжлэг, тусламж аваагүй гэж мэдэгдлээ. 
Расизмын асуудал 

Энэ удаагийн мэтгэлцээн тайван, боловсон уур амьсгалтай болж өнгөрсөн ч Ерөнхийлөгч Д.Трамп гадаад бодлого, арьс өнгөний үзэлтэй холбоотой асуудлууд дээр ширүүн хариулт хэлж байв. Д.Трамп өөрийгөө арьс өнгөөр ялгаварлах үзэлгүй, хар арьстнуудын төлөө ихийг хийсэн гэж хэлсэн юм.
 

Байдены рейтинг 

“The New York Times” сонины захиалгаар Сиена-коллежийн судалгааны албан нэр дэвшигчдийн рейтингийг гаргажээ. Аравдугаар сарын 20-ны байдлаар Жо Байдены рейтинг Д.Трампынхаас есөн хувиар давж гарчээ. Санал асуулгад оролцсон хүмүүсийн 50 хувь нь Ардчилсан намаас нэр дэвшигчийг дэмжиж бол 41 хувь нь Бүгд найрамдах намаас нэр дэвшигчийг дэмжсэн.