Төр нийгмийн нэрт зүтгэлтэн С.Зориг агсны хэргээр ял эдэлж буй Т.Чимгээгийн ах Т.Хүрэлбат Сүхбаатарын талбайд өлсгөлөн зарлаад буй. Тэрбээр  өлсгөлөн зарлаад 137 цаг болж байна. Дөнгөж сая тэрбээр хэвлэлийнхэнд мэдээлэл хийлээ.

Энэ үеэр Т.Хүрэлбат "Хэргийг ил болгох талаар олон нийт бүгдээрээ ярьж байна. Хурцын өмгөөлөгч Б.Мэргэн "Энэ хэргийг ил болгох сонирхол байсан бол янз бүрийн залхаан цээрлэлт хийх шаардлага байгаагүй" гэсэн.  Би нэг зүйлийг гайхаад байгаа юм. Ерөнхийлөгч  "Хэрэг хүлээ. Уучлал үзүүлнэ" гэсэн утгатай зүйлийг ярьсан. Нэг талдаа энэ доромжлол. Энэ хэргийг бусармагаар шийдсэн шүүгч нар бий. Тухайн үед Ганхуягийг хамтрагч, T.Булганыг хамжигч гээд 2016 онд баривчилсан. Т.Чимгээ, Б.Содномдаржаа нарыг  мөн барьчихсан байсан.

Энэ талаар Бархасбадь гэдэг хүн "2016 оны есдүгээр сарын 2-нд Ганхуяг, Булган, Т.Чимгээ, Б.Содномдаржаа, Отгонбаатар, Ц.Амгаланбаатар, Э.Бат-Үүл зэрэг хүмүүсийг С.Зоргийн амийг зохион байгуулалттай хөнөөсөн нь хавтаст хэрэгт авсан нотлох баримтаар ногтлогдож байна" гэсэн байдаг. Тиймээс Э.Бат-Үүл гэдэг хүнийг санаатайгаар улс төрийн аллага хийхийг завдсан гэсэн үндэслэлээр ялаглагдагчаар татсан юм билээ. Үүнээс хойш Ганхуягийг найман сар, Э.Булганыг 10 сар хориод сулласан. Үүний дараа Нийслэлийн хяналтын прокурор Батжаргал "Э.Бат-Үүл энэ хэргийг зохион байгуулсан гэх нотлох баримт байхгүй байна" гээд ялагдагчаар татсан тогтоолыг хүчингүй болгосон. Тэгээд хамжигч, хамтрагч, захиалагч гэсэн хүмүүсийг суллаж явуулсан. Ингээд Чимгээ, Содномдаржаа нарыг захиалгатай хэрэг үйлдсэн байна гээд аваад үлдчихсэн юм. Үүнийг Чимгээ надад хэлэхдээ "Нууцын зэрэглэл гээд ярьж болохгүй юм байна гэж бодоод зургаа, долоон жил болсон. Би нууц гэж байгаад шоронд гүтгэгдээд байж болохгүй. Тиймээс та үүнийг олон нийтэд хэл" гэсэн. Би дүүгээ суллах хүртэл өлсгөлөн зарлана гэж байсан ч дөрөвдүгээр сарын 3-нд хөл хорио тогтоно гэж байна. Би яахаа мэдэхгүй байна. Ц.Амгаланбаатар мэдүүлэгтээ хэргийн захиалагчийн Э.Бат-Үүл гэж өгсөн юм билээ. Захиалагчийн нь суллаад явуулчихсан хэрнээ захиалгаар хүн алсан гээд хоёр хүнийг  хорьчихсон үүнийг нь ойлгохгүй байна" гэсэн юм.