Цахим орчинд энэ сарын 19-нд "Мануул гэдэг амьтанд хэрэгтэй зүйл байдаг юм уу. Хонь мал бариад байхаар нь гурвыг агналаа" гэх мэдээлэл байршуулсаны дагуу Экологийн цагдаагийн албанаас шалгалтын ажиллагаа явуулжээ.

Шалгалтаар Сүхбаатар аймгийн Баяндэлгэр сумын нутаг Хөшигийн дэрс гэх газарт иргэн Б хонь хариулж явахдаа малын сэг зэм идэж байсан ховордож болзошгүй ангилалд багтдаг зэрлэг муурын төрөл болох нэг мануул агнасан нь тогтоогдсон байна.

Цаашид шалгалтын ажиллагааг хуулийн дагуу явуулж, экологи, эдийн засагт учруулсан хохирлыг нөхөн төлүүлэх, буруутай этгээдэд Зөрчлийн тухай хуулийн 7.6.1.3-т заасны дагуу зохих хариуцлагыг ногдуулах аж.

Мануул нь ОХУ, БНХАУ-д улаан номонд орсон бол манайд ховордож болзошгүй ангилалд ордог. Олон улсын хэмжээнд  дээл, хантааз, нударга, пальтоны зах, малгай хийх зорилгоор арьсыг нь худалдаалдаг учир хараа хяналтгүй агнаж, энэ зүйлийн тоо толгой нь буурч байна гэж үздэг. Мөн үлийн цагаан оготнын (Lasiopodomys brandti) тоо толгойг зохицуулах зорилгоор хэрэглэж буй Бромадиолне химийн хорт бодисонд дам өртдөг, уламжлалт анагаах ухаанд гадар өөхийг нь эмчилгээний зорилгоор хэрэглэдэг зэрэг ч мөн адил ховордлын шалтгаан болдог байна.

Ач холбогдлын хувьд үлийн цагаан оготно болон хөдөө аж ахуйн хортон мэрэгчдийн тоо толгойг бууруулахад чухал үүрэгтэй. Энэ нь мал аж ахуй эрхэлдэг монгол орны хувьд бэлчээрийн даацыг хэвийн байлгадаг аж. Түүнчлэн аюулд орсон үедээ нүүрэн дээрээ аргал барьж, өөрийгөө аюулгүй боллоо гэж боддог байна. Харин нүдээ аниад хэвтэхээрээ тэр хавийн орчноо харанхуй боллоо гэж эндүүрдэг аж.