Улаанбаатар хот дахь Гаалийн газрын Гаалийн хяналт, шалгалт хариуцсан орлогч дарга О.Цогтбаатар авлига авч байгаад үйлдэл дээрээ баригджээ. Тодруулбал, өнгөрсөн даваа гарагийн орой ресторанд нэгэн аж ахуйн нэгжийн захирал, ажилтантай уулзан, авлига авах гэж байгаад үйлдэл дээрээ баригдсан гэнэ. Түүнийг Цагдан хорих 461 дүгээр ангид саатуулсан ч ганцхан хонуулаад шүүх хурлаар сулласан аж. Тиймээс тэрбээр өдгөө хэвийн ажлаа хийж байгааг эх сурвалж хэллээ. Түүнчлэн О.Цогтбаатар удаа дараалан авлигал авсан нь мөрдөн байцаалтын явцад тогтоогдсон байна.

Энэ хэрэгтэй холбогдуулан Улаанбаатар хот дахь Гаалийн газрын дарга Д.Солонгыг ч мөн хамаатуулан шалгаж, мөрдөн байцаалт явуулж байгаа юм байна. Ингэж үзэх хэд хэдэн шалтгаан байгааг албаны эх сурвалж мэдээллээ.

Д.Солонго өмнө нь Замын-­Үүдийн гаалийн газрын орлогч даргаар ажиллаж байгаад улсын төсвийн тодорхой хувийг бүрдүүлдэг Улаанбаатар хот дахь Гаалийн газрын орлогч даргын зөөлөн суудалд суусан. Үүнээсээ хэдхэн сарын дараа тэрбээр тус газрын дарга болсон байдаг. Жилийн дотор албан тушаал ахисан түүнийг саар мэдээ багагүй дагадаг. 

АТГ­-аас Замын­-Үүдийн гаалийн байцаагч нар хэрхэн авлига авдаг, авсан мөнгөө ажлынхаа байранд хэрхэн нуудаг талаар ноцтой бичлэгийг өнгөрсөн жил олон нийтэд дэлгэсэн. Тэгвэл дээрх авлигын хэргийн үйл явц Д.Солонгыг тус газрын дэд даргаар ажиллаж байхад нь үйлдэгджээ.

Тэрбээр ажилдаа томилогдоод удалгүй өөрийнхөө багийг бүрдүүлсэн байна.